پی ایس ایل 12: پاکستان سپر لیگ 19 مارچ سے شروع ہونے کا امکان
ذرائع کے مطابق پاکستان کرکٹ بورڈ (پی سی بی) فرنچائز مالکان کو اعتماد میں لینے کے بعد ایونٹ کی حتمی تاریخوں کا باضابطہ اعلان کرے گا۔
ذرائع کا کہنا ہے کہ براڈکاسٹرز کی جانب سے لیگ جنوری میں شروع کرنے پر مجبور دیا گیا تھا جس کا مقصد اسپانسرشپ کے حصول میں آسانی پیدا کرنا تھا تاہم فرنچائز مالکان اپریل کی ونڈو کو ترجیح دے رہے تھے۔
پی سی بی نے اب 19 مارچ سے ٹورنامنٹ شروع کرنے کا فیصلہ کیا ہے جبکہ فائنل کیلئے 2 مئی کی تاریخ تجویز کی گئی ہے۔
آئندہ سال رمضان المبارک کا آغاز 8 فروری کو متوقع ہے اس لیے لیگ رمضان کے بعد منعقد کرنے کی منصوبہ بندی کی گئی ہے تاہم پی ایس ایل 12 کے میچز ایک بار پھر انڈین پریمیئر لیگ (آئی پی ایل) سے متصادم ہوں گے، جس کا ممکنہ انعقاد 10 مارچ سے 15 مئی تک ہوگا۔
ذرائع کے مطابق گزشتہ برسوں میں بھی دونوں لیگز کے شیڈول میں ٹکراؤ رہا تاہم پاکستانی لیگ کی ٹی وی ریٹنگز پر نمایاں اثر نہیں پڑا اور شائقین نے پی ایس ایل میں بھرپور دلچسپی برقرار رکھی۔
حکام کو امید ہے کہ آئندہ ایڈیشن میں بھی پاکستانی لیگ کو شائقین کی اسی طرح پذیرائی حاصل ہوگی۔
دوسری جانب آئی پی ایل میں شرکت نہ کرنے والے کئی غیر ملکی کھلاڑیوں کی پی ایس ایل میں شمولیت کا امکان بھی ظاہر کیا جارہا ہے۔ پلیئرز آکشن کی تاریخ ابھی طے نہیں ہوئی تاہم بعض فرنچائزز نے غیر ملکی اسٹارز سے رابطے شروع کر دیے ہیں۔
یہ بھی پڑھیں: خیبرپختونخوا: لکی مروت میں فائرنگ، 3 مقامی کرکٹر شہید
ذرائع کے مطابق کچھ اہم غیر ملکی کھلاڑی پہلی مرتبہ پی ایس ایل کا حصہ بن سکتے ہیں۔ فی الحال کھلاڑیوں سے متعلق معاملات سست رفتاری سے آگے بڑھ رہے ہیں لیکن لیگ کی تاریخوں کے باضابطہ اعلان کے بعد اس عمل میں تیزی آنے کا امکان ہے۔
پی ایس ایل 12 کے وینیوز اور دیگر انتظامی تفصیلات کو بھی جلد حتمی شکل دی جائیں گی۔
