بے نظیر انکم سپورٹ پروگرام کی خواتین کیلئے اہم اعلان
بی آئی ایس پی کے ترجمان کے مطابق وہ تمام بینیفیشری خواتین جو تاحال بینظیر سم حاصل نہیں کرسکیں، وہ اپنا اصل شناختی کارڈ اور موبائل فون ہمراہ لے کر قریبی بی آئی ایس پی دفتر جائیں اور مفت سم حاصل کریں۔
ترجمان نے واضح کیا کہ بینظیر سم حاصل نہ کرنے والی خواتین کو وظائف کی رقم وصول کرنے میں مشکلات کا سامنا ہوسکتا ہے۔
چیئرپرسن بی آئی ایس پی سینیٹر روبینہ خالد کے مطابق بینظیر سم کی ایکٹیویشن بی آئی ایس پی دفتر میں متعلقہ موبائل کمپنی کا نمائندہ کرے گا۔
یہ بھی پڑھیں: خیبرپختونخوا میں گورنر راج، اختیار ولی کا اہم بیان آگیا
انہوں نے خواتین کو ہدایت کی کہ سم حاصل کرتے وقت بی آئی ایس پی کے عملے سے کہیں کہ سم ان کے موبائل فون میں خود ڈال کر ایکٹیویٹ کی جائے، تاکہ سم کے حصول اور ایکٹیویشن کا عمل درست طریقے سے مکمل ہوسکے۔
بی آئی ایس پی حکام نے بینیفیشری خواتین سے اپیل کی ہے کہ وہ آخری تاریخ کا انتظار کیے بغیر جلد از جلد قریبی دفتر سے مفت بینظیر سم حاصل کرلیں۔
