خضدار میں 4.5 شدت کا زلزلہ، شہری خوفزدہ ہوگئے
زلزلہ پیمائی مرکز کے مطابق خضدار میں آنے والے زلزلے کی شدت ریکٹر اسکیل پر 4.5 ریکارڈ کی گئی جبکہ زلزلے کی گہرائی زمین کے اندر 30 کلومیٹر تھی۔
زلزلے کا مرکز خضدار سے تقریباً 45 کلومیٹر مشرق میں واقع تھا، زلزلے کے جھٹکے خضدار اور ملحقہ علاقوں میں محسوس کیے گئے، جس کے بعد شہریوں میں خوف و ہراس پھیل گیا۔
زلزلے کے جھٹکے محسوس ہوتے ہی متعدد افراد گھروں اور عمارتوں سے باہر نکل آئے، شہریوں نے کھلے مقامات کا رخ کیا اور بعض افراد خوف کے باعث کلمۂ طیبہ کا ورد کرتے رہے۔
ریسکیو حکام کے مطابق ابتدائی اطلاعات میں زلزلے کے باعث کسی جانی نقصان کی اطلاع نہیں ملی، تاہم زلزلے کے بعد متعلقہ اداروں کی جانب سے صورتحال پر نظر رکھی جا رہی ہے۔
واضح رہے کہ بلوچستان کا شمار پاکستان کے ان علاقوں میں ہوتا ہے جہاں وقتاً فوقتاً زلزلے کے جھٹکے محسوس کیے جاتے ہیں۔ زلزلے کی صورت میں شہریوں کو گھبرانے کے بجائے احتیاطی تدابیر اختیار کرنے اور عمارتوں کے اندر موجود ہونے کی صورت میں کھڑکیوں، شیشوں اور بھاری اشیا سے دور رہنے کی ہدایت کی جاتی ہے۔
یہ بھی پڑھیں:عمران خان کی بہنیں عظمیٰ خان اور نورین نیازی بھی گرفتار
حکام کا کہنا ہے کہ کسی بھی ہنگامی صورتحال کی صورت میں شہری فوری طور پر متعلقہ ریسکیو اداروں سے رابطہ کریں۔
