میڈیکل میں جانے والے طلبہ کے لیے اہم خبر، ایم ڈی کیٹ 2026 سے متعلق اعلامیہ جاری
پی ایم ڈی سی کے مطابق ایم ڈی کیٹ 2026 کے لیے مجموعی طور پر ایک لاکھ 38 ہزار 158 امیدواروں نے رجسٹریشن کرائی تھی۔ امتحان ملک کے 34 شہروں سمیت سعودی عرب کے شہر ریاض میں بھی منعقد کیا گیا۔
اعلامیے کے مطابق صدر پی ایم ڈی سی ڈاکٹر رضوان تاج نے اسلام آباد میں قائم امتحانی مراکز کا دورہ کیا، جہاں انہوں نے امتحانی انتظامات اور جاری عمل کا جائزہ لیا۔ اس موقع پر امیدواروں کو فراہم کی جانے والی سہولیات کا بھی جائزہ لیا گیا۔
یہ بھی پڑھیں: بجلی صارفین اب اپنی مرضی سے بجلی خرید سکیں گے
صدر پی ایم ڈی سی ڈاکٹر رضوان تاج نے بتایا کہ آزاد جموں و کشمیر کے امیدواروں کے لیے اسلام آباد میں خصوصی امتحانی مراکز قائم کیے گئے تھے۔
انہوں نے مزید کہا کہ ایم ڈی کیٹ کے سوالات کا امتحان کے بعد پوسٹ ہاک تجزیہ کیا جائے گا، جبکہ موجودہ کونسل کی جانب سے یہ امتحان دوسری مرتبہ کامیابی سے منعقد کیا گیا ہے۔
واضح رہے کہ کراچی سمیت ملک بھرمیں ایم ڈی کیٹ 2026 کا پُرامن انعقاد ہوا،ایم ڈی کیٹ صبح 10 بجے شروع ہوا اور دوپہر ایک بجے اختتام پذیر ہوا۔
ترجمان یو ایچ ایس کے مطابق ایم ڈی کیٹ 2026 کی جوابی کلید آج شام 6 بجے کے بعد جاری کی جائے گی،امیدوار کاربن کاپی اور سرکاری جوابی کلید سے متوقع نمبروں کا اندازہ کرسکیں گے،سرکاری نتیجہ ایک ہفتے کے اندر جاری کیے جانے کا امکان ہے۔
