پاکستان اور آئی اے ای اے کے درمیان چشمہ فائیو نیوکلیئر پاور پلانٹ کے سیف گارڈز معاہدے پر دستخط
سیف گارڈز معاہدے پر پاکستان اٹامک انرجی کمیشن (پی اے ای سی) کے چیئرمین علی رضا اور آئی اے ای اے کے ڈائریکٹر جنرل نے دستخط کیے۔ اس موقع پر چائنا اٹامک انرجی اتھارٹی کے چیئرمین بھی تقریب میں شریک ہوئے۔
ملاقات کے دوران پاکستان اور آئی اے ای اے کے درمیان جوہری توانائی کے شعبے میں باہمی تعاون کو مزید فروغ دینے سمیت مختلف امور پر تبادلہ خیال کیا گیا۔
واضح رہے کہ آئی اے ای اے کے بورڈ آف گورنرز نے رواں سال مارچ میں چشمہ فائیو (سی-5) کے سیف گارڈز معاہدے کی متفقہ طور پر منظوری دی تھی۔
یہ بھی پڑھیں: سپریم کورٹ میں زیر سماعت عمران خان کے کیس کا ریکارڈ طلب
سیف گارڈز معاہدے کو پاکستان کے پرامن جوہری پروگرام اور جوہری عدم پھیلاؤ سے متعلق اپنی ذمہ داریاں پوری کرنے کے عزم پر عالمی اعتماد کا مظہر قرار دیا جا رہا ہے۔
دوسری جانب چشمہ فائیو نیوکلیئر پاور پلانٹ کی تعمیر کا کام بھی تیزی سے جاری ہے۔ منصوبے کے ری ایکٹر بلڈنگ کے گنبد کی تنصیب مقررہ وقت سے پہلے مکمل کرلی گئی ہے۔
چشمہ فائیو نیوکلیئر پاور پلانٹ کی پیداواری صلاحیت 1200 میگاواٹ ہوگی اور منصوبے سے 2028 میں بجلی کی پیداوار شروع ہونے کی توقع ہے۔
پاکستان اس وقت مجموعی طور پر 3 ہزار 532 میگاواٹ بجلی پیدا کرنے کی صلاحیت رکھنے والے 6 نیوکلیئر پاور پلانٹس کامیابی سے چلا رہا ہے۔
