غیر اعلانیہ لوڈشیڈنگ پر وزیراعظم کا نوٹس، 2 گھنٹے سے زیادہ لوڈشیڈنگ نہ کرنے کی ہدایت
وزیراعظم نے مختلف شہروں میں بجلی کی لوڈشیڈنگ پر برہمی کا اظہار کرتے ہوئے ہدایت کی کہ کسی بھی علاقے میں 2 گھنٹے سے زیادہ بجلی بند نہیں ہونی چاہیے۔
وزیراعظم آفس کے اعلامیے کے مطابق شہباز شریف کی زیر صدارت ملک میں بجلی کی لوڈ مینجمنٹ سے متعلق اجلاس ہوا، جس میں بجلی کی موجودہ صورتحال اور لوڈ مینجمنٹ کا جائزہ لیا گیا۔
اجلاس کے دوران خطے کی حالیہ صورتحال کے باعث آر ایل این جی کی فراہمی سے متعلق وزیراعظم کو بریفنگ دی گئی۔ حکام نے بتایا کہ آبنائے ہرمز میں کشیدگی اور ترسیلی مشکلات کے باعث آر ایل این جی کی سپلائی متاثر ہوئی ہے۔
یہ بھی پڑھیں: وفاقی سرکاری ملازمین کی وفات پر معاونتی پیکیج میں بڑی تبدیلی، نیا پیکیج نافذ
بریفنگ میں بتایا گیا کہ آر ایل این جی کی فراہمی میں کمی کے باعث بجلی کی پیداوار بھی متاثر ہوئی، جس کے نتیجے میں طلب اور رسد میں توازن برقرار رکھنے کے لیے لوڈ مینجمنٹ کرنا پڑ رہی ہے۔
اس موقع پر وزیراعظم نے آر ایل این جی کی ترسیل میں تعطل سے نمٹنے کے لیے فوری اقدامات کی ہدایت کرتے ہوئے کہا کہ بجلی کی پیداوار اور فراہمی کے لیے تمام دستیاب وسائل کو مؤثر طریقے سے استعمال کیا جائے۔
شہباز شریف نے واضح ہدایت کی کہ ملک کے کسی بھی علاقے میں 2 گھنٹے سے زیادہ لوڈشیڈنگ نہ کی جائے۔ انہوں نے عوامی شکایات کے فوری ازالے کے لیے ریڈریسل کمیٹیوں میں عوامی نمائندگی شامل کرنے کی بھی ہدایت کی۔
وزیراعظم نے ایک ہفتے کے اندر ڈسکوز کی سطح پر کنزیومر گریوینس ریڈریسل کمیٹیوں کو فعال کرنے کے احکامات بھی جاری کیے ہیں تاکہ بجلی سے متعلق عوامی شکایات کا بروقت ازالہ یقینی بنایا جاسکے۔
