الیکشن کمیشن ارکان کی تقرری: وزیراعظم کا اپوزیشن لیڈرکو خط
میڈیا رپورٹس کے مطابق وزیراعظم شہباز شریف نے اپوزیشن لیڈر محمود خان اچکزئی کے خط کا تحریری جواب بھجوا دیا ہے، جس میں چیف الیکشن کمشنر اور الیکشن کمیشن کے نئے ارکان کی تقرری سے متعلق حکومتی مؤقف سے آگاہ کیا گیا ہے۔
محمود خان اچکزئی سے مسلم لیگ ن کے رہنماؤں رانا ثنا اللہ اور ڈاکٹر طارق فضل چوہدری نے ملاقات بھی کی تھی۔ ملاقات کے دوران وزیراعظم کی جانب سے اپوزیشن لیڈر کے خط کا جواب بھجوانے کی یقین دہانی کرائی گئی تھی۔
یہ بھی پڑھیں: وزیر اعلیٰ سہیل آفریدی سمیت پی ٹی آئی رہنماؤں کے وارنٹ گرفتاری جاری
محمود خان اچکزئی اس وقت کوئٹہ میں موجود ہیں اور آئندہ دو سے تین روز میں اسلام آباد پہنچیں گے۔ ذرائع کے مطابق اسلام آباد واپسی کے بعد وہ وزیراعظم کے خط پر پاکستان تحریک انصاف کی قیادت سے مشاورت کریں گے۔
اپوزیشن لیڈر محمود خان اچکزئی سینیٹ میں اپوزیشن لیڈر علامہ راجہ ناصر عباس کو بھی وزیراعظم کے خط سے متعلق اعتماد میں لیں گے۔
الیکشن کمیشن میں چیف الیکشن کمشنر اور نئے ارکان کی تقرری کے معاملے میں آئینی طریقہ کار کے تحت حکومت اور اپوزیشن کے درمیان مشاورت کو اہم قرار دیا جا رہا ہے۔
وزیراعظم کا خط اپوزیشن لیڈر کو موصول ہو چکا ہے۔ اس سے قبل سابق اپوزیشن لیڈر عمر ایوب نے بھی چیف الیکشن کمشنر کی تقرری کے حوالے سے خط لکھا تھا
