وزیر اعلیٰ سہیل آفریدی سمیت پی ٹی آئی رہنماؤں کے وارنٹ گرفتاری جاری
عدالت نے چاروں پی ٹی آئی رہنماؤں کی گرفتاری کے لیے احکامات جاری کرتے ہوئے ایس ایچ او تھانہ رمنا کو ہدایت کی ہے کہ ملزمان کو گرفتار کرکے عدالت کے روبرو پیش کیا جائے۔
واضح رہے کہ پی ٹی آئی کی جانب سے 27 ستمبر کو ملک گیر احتجاج کا اعلان کیا گیا ہے۔
میڈیا رپورٹس کے مطابق اسلام آباد تھانہ رمنا میں درج 975/24 مقدمے کی سماعت کے دوران عدالت نے چاروں ملزمان کی حاضری اور مقدمے سے متعلق امور کا جائزہ لیا۔
عدالت کی جانب سے ملزمان کے ناقابلِ ضمانت وارنٹ گرفتاری جاری کیے جانے کے بعد پولیس کوان کی گرفتاری کی ذمہ داری سونپی گئی ہے۔
یہ بھی پڑھیں: عمران خان کے ایکس اکاؤنٹ پر پابندی کی درخواست پر پیشرفت
تھانہ رمنا میں درج مقدمے کے حوالے سے عدالت کی جانب سے جاری احکامات کے بعد پولیس نے چاروں ملزمان کی گرفتاری کے لیے کارروائی شروع کردی ہے۔
خیال رہے کہ یہ مقدمہ پاکستان تحریک انصاف (پی ٹی آئی) کی جانب سے2024 میں وفاقی دارالحکومت اسلام آباد میں کیے گئے احتجاج اورمظاہروں کے سلسلے میں درج کیا گیا تھا۔
پی ٹی آئی نے بانی عمران خان کی رہائی سمیت دیگرمطالبات کے لیے 24 نومبر2024 کواسلام آباد میں احتجاج کی کال دی تھی، جس کے بعد کارکنان اور قافلے دارالحکومت پہنچے تھے۔
احتجاج کے دوران ڈی چوک جانے کی کوشش پرپولیس اورمظاہرین میں جھڑپیں ہوئیں جبکہ مختلف مقامات پر مبینہ توڑ پھوڑ، سرکاری املاک کو نقصان اور دفعہ 144 کی خلاف ورزی کے واقعات بھی رپورٹ ہوئے تھے۔
پولیس نے متعدد مظاہرین کو گرفتار کیا اور اسلام آباد کے مختلف تھانوں میں مقدمات درج کیے انہی مقدمات میں تھانہ رمنا کا مقدمہ بھی شامل ہے۔
