پولیو ورکرز کے معاوضے میں 28 فیصد اضافے کا اعلان
وزیراعظم کی فوکل پرسن برائے انسداد پولیو عائشہ رضا فاروق نے کہا کہ معاوضے میں اضافہ پولیو ورکرز کی محنت لگن اور ملک کو اس خطرناک بیماری سے پاک کرنے کے لیے دی جانے والی خدمات کا اعتراف ہے۔
ان کا کہنا تھا کہ فرنٹ لائن ورکرز پاکستان کو پولیو سے پاک بنانے کی قومی کوششوں میں ہراول دستے کا کردار ادا کر رہے ہیں۔
نیشنل ای او سی حکام کے مطابق گزشتہ چند ماہ کے دوران فرنٹ لائن ورکرز کے ساتھ خصوصی لسننگ سیشنز کیے گئے ہیں، جن میں انہوں نے اعلی قیادت کے سامنے اپنے مسائل، تجاویز اور آرا براہ راست پیش کیں، انہی سیشنز کے بعد یومیہ معاوضے میں اضافے کا فیصلہ کیا گیا۔
یہ بھی پڑھیں: الیکٹرک بائیک ماہانہ قسط 3,028 روپے میں حاصل کریں
نیشنل ایمرجنسی آپریشنز سینٹر (NEOC) کے مطابق نئے معاوضے کا اطلاق آئندہ انسدادِ پولیو مہم سے کیا جائے گا۔
عائشہ رضا فاروق نے بتایا کہ اگلی ملک گیر انسدادِ پولیو مہم 21 سے 27 ستمبر تک ملک کے 115 اضلاع میں ہوگی۔
مہم کے دوران پولیو ٹیمیں گھر گھر جا کر پانچ سال سے کم عمر بچوں کو پولیو سے بچاؤ کے قطرے پلائیں گی۔
