سی ایس ایس امیدواروں کیلئے عمر اور امتحانی مواقع بڑھانے کی سفارش مسترد
قائمہ کمیٹی کی ذیلی کمیٹی کی جانب سے سی ایس ایس امتحان کیلئے عمر کی بالائی حد میں اضافے کی سفارش کی گئی تھی، جبکہ قائمہ کمیٹی کابینہ سیکرٹریٹ نے امیدواروں کو مزید مواقع فراہم کرنے کی تجویز بھی دی تھی۔ تاہم اسٹیبلشمنٹ ڈویژن نے موجودہ پالیسی برقرار رکھنے کا فیصلہ کیا ہے۔
اسٹیبلشمنٹ ڈویژن نے پارلیمانی کمیٹی کو سی ایس ایس سے متعلق اپنی پالیسی پر تحریری مؤقف سے آگاہ کرتے ہوئے سفارشات کو ناقابل عمل قرار دیا۔ ڈویژن کے مطابق عمر کی حد یا امتحان میں شرکت کے مواقع بڑھانا وفاقی حکومت کے پالیسی دائرہ اختیار میں آتا ہے جبکہ وفاقی پبلک سروس کمیشن (ایف پی ایس سی) حکومت کی منظور شدہ پالیسی پر عمل درآمد کرتا ہے۔
اسٹیبلشمنٹ ڈویژن کے مطابق ایف پی ایس سی کے 174ویں اجلاس میں بھی موجودہ پالیسی برقرار رکھنے کا فیصلہ کیا گیا۔
حکام کا مؤقف ہے کہ عمر کی بالائی حد بڑھانے سے سی ایس ایس امتحان میں امیدواروں کی تعداد میں نمایاں اضافہ ہوسکتا ہے، جس کے نتیجے میں امتحان کے انعقاد اور پرچوں کی جانچ کا بوجھ بڑھ جائے گا۔
یہ بھی پڑھیں:یاسین ملک کی بیٹی رضیہ سلطان کی طبیعت خراب، اسپتال منتقل
مزید مواقع دینے کے حوالے سے بھی خدشہ ظاہر کیا گیا ہے کہ امیدوار بار بار امتحان میں شرکت کرکے اپنے پیداواری سال ضائع کرسکتے ہیں۔ اس کے علاوہ زیادہ عمر میں سول سروس میں شامل ہونے والے افسران کی مدت ملازمت کم ہونے اور اعلیٰ عہدوں کیلئے تجربہ کار افسران کی طویل المدتی دستیابی متاثر ہونے کا خدشہ بھی ظاہر کیا گیا ہے۔
