یاسین ملک کی بیٹی رضیہ سلطان کی طبیعت خراب، اسپتال منتقل
ذرائع کے مطابق رضیہ سلطان کی طبیعت خراب ہونے پر انہیں فوری طبی امداد کیلئے اسپتال لے جایا گیا، تاہم ان کی بیماری یا طبیعت کی خرابی کی وجوہات کے حوالے سے مزید تفصیلات سامنے نہیں آسکیں۔
واضح رہے کہ کشمیری حریت رہنما یاسین ملک 2019 سے بھارت کی تہاڑ جیل میں قید ہیں۔ انہوں نے بھارتی عدالتوں سے انصاف ملنے کی امید ختم ہونے کا مؤقف اختیار کرتے ہوئے اپنے مقدمات کے حوالے سے سخت موقف اپنایا ہے۔
گزشتہ روز یاسین ملک نے سری نگر کی عدالت میں اپنا مقدمہ مزید لڑنے سے انکار کرتے ہوئے 25 صفحات پر مشتمل حلف نامہ جمع کرایا تھا۔ حلف نامے میں انہوں نے کہا تھا کہ انہیں بھارتی عدالتوں سے انصاف کی توقع نہیں اور اگر انہیں سزائے موت بھی دی گئی تو وہ اسے قبول کریں گے۔
یاسین ملک نے اپنے حلف نامے میں مؤقف اختیار کیا کہ بھارتی حکومت انہیں 36 سال بعد ایک جھوٹے مقدمے میں ملوث کرکے پھانسی دینے کی سازش کر رہی ہے۔ انہوں نے 1990 کے سرلا بھٹ قتل کیس میں ملوث ہونے کے الزام کی بھی دوٹوک تردید کی۔
کشمیری رہنما کے مطابق انہیں جے کے ایل ایف کے ایک مبینہ نوٹ کی بنیاد پر سرلا بھٹ قتل کیس میں شامل کیا گیا، تاہم بعد میں مذکورہ نوٹ ریکارڈ سے غائب ہوگیا، جس پر انہوں نے سوالات اٹھائے۔
یہ بھی پڑھیں:عمران خان باہر آئے تو اپنے خلاف سازشوں کا حساب لوں گا: علی امین گنڈاپور
یاسین ملک نے مزید مؤقف اختیار کیا کہ سرلا بھٹ کے قتل سے 11 روز قبل وہ شدید زخمی تھے، اس لیے قتل کی منصوبہ بندی یا اس حوالے سے ہدایات دینا ممکن نہیں تھا۔
ذہن نشین رہے کہ انہوں نے کچھ روز قبل اپنی اہلیہ سے علیحدگی کا اعلان بھی کیا تھا۔
