عمران خان باہر آئے تو اپنے خلاف سازشوں کا حساب لوں گا: علی امین گنڈاپور
ایک سوال کے جواب میں انہوں نے کہا کہ میرے خلاف جو سازشیں کی گئیں بانی باہر آئیں گے تو اس کا حساب لوں گا، میرے خلاف سازش، غلط رویہ رکھنے والوں کو میں نے کچھ نہیں کہا، میرے لئے بانی کی رہائی اور پارٹی کی تحریک اہمیت رکھتی ہے۔
انہوں نے کہا کہ بانی پی ٹی آئی کا آخری پیغام وزارتِ اعلیٰ سے ہٹائے جانے کے بعد حکومت سے متعلق آیا تھا، پیغام تھا کہ حکومت جائے یا گورنر راج لگے، تاہم ڈرون حملے نہیں ہونے چاہئیں۔
علی امین گنڈاپور نے موجودہ وزیراعلیٰ خیبرپختونخوا سہیل آفریدی کے حوالے سے کہا کہ وہ ان کے چھوٹے بھائی کی طرح ہیں اور انہیں پارٹی ٹکٹ دلوانے میں بھی انہوں نے کردار ادا کیا۔ ان کے مطابق پارلیمانی بورڈ میں سہیل آفریدی کو ٹکٹ نہیں مل رہا تھا، تاہم انہوں نے کوشش کرکے ٹکٹ دلوایا اور بعد ازاں انہیں کابینہ میں بھی شامل کیا۔
سابق وزیراعلیٰ نے کہا کہ 27 ستمبر کو پارٹی کی جانب سے جن لوگوں نے قیادت کرنی ہے، یہ ان کی ذمہ داری ہے۔
لاہور میں جلسے کے حوالے سے گفتگو کرتے ہوئے علی امین گنڈاپور نے کہا کہ جلسے کی اجازت دباؤ کے تحت اس شرط پر دی گئی تھی کہ وہ جتھا لے کر نہ آئیں۔ ان کا کہنا تھا کہ وہ دو دن میں لاہور پہنچے اور شام 5 بج کر 5 منٹ پر شاہدرہ پہنچ چکے تھے، جہاں انہوں نے کنٹینر ہٹانے کی کوشش بھی کی۔
انہوں نے بتایا کہ بعد میں ان پر جان بوجھ کر تاخیر سے پہنچنے کا الزام لگایا گیا، جبکہ انہیں راولپنڈی کے لیاقت باغ میں جلسے کیلئے کہا گیا تھا۔، پارٹی کارکنوں نے 18 گھنٹے جدوجہد کے بعد راولپنڈی کے قریب پہنچنے پر اطلاع دی کہ اب جلسہ نہیں کرنا۔
یہ بھی پڑھیں:ٹریفک جرمانوں سے متعلق نئے احکامات سامنے آگئے
علی امین گنڈاپور نے کہا کہ 27 ستمبر کو اپنی طاقت کے ساتھ پارٹی کیلئے نکلیں گے، تاہم اس وقت لوگ کنفیوژن کا شکار ہیں، اس روز پارٹی کا جو بھی پلان ہوگا، وہ اس پر عمل کریں گے۔
