محفوظ بسنت 2027: 5 ستمبر سے رجسٹریشن شروع ہوگی
ڈی سی لاہور نے سماجی رابطے کی ویب سائٹ ایکس (X) پر اپنے پیغام میں بتایا کہ 5 ستمبر سے بسنت کے سامان کی تیاری کے لیے رجسٹریشن کا آغاز کیا جائے گا۔
انہوں نے کہا کہ لاہور بھر میں پتنگ بازی کے سامان کی تیاری کے لیے باقاعدہ اجازت نامہ حاصل کرنا لازمی ہوگا اور صرف این او سی جاری ہونے والے افراد ہی پتنگ بازی کا سامان تیار کر سکیں گے۔
کیپٹن (ر) محمد علی اعجاز کے مطابق ضلعی انتظامیہ کی ٹیمیں منظور شدہ سامان کی تیاری کے عمل کی کڑی مانیٹرنگ کریں گی تاکہ حفاظتی ضابطوں پر مکمل عمل درآمد یقینی بنایا جا سکے۔
ڈی سی لاہور نے واضح کیا کہ بسنت کے لیے صرف منظور شدہ سائز کی پتنگیں، ڈور کے لیے مقررہ پنا اور سوتی ڈور کے استعمال کی اجازت ہوگی۔
انہوں نے کہا کہ لاہور میں محفوظ بسنت کو ہر صورت یقینی بنایا جائے گا اور صرف منظور شدہ سائز اور سوتی ڈور کا استعمال ہی بسنت کو محفوظ بنانے میں مددگار ثابت ہوگا۔
ڈپٹی کمشنر لاہور نے مزید کہا کہ انتظامیہ پتنگ بازی کے روایتی حسن کو جدید حفاظتی ضابطوں کے ساتھ بحال کرنے کے لیے اقدامات کر رہی ہے تاکہ شہری محفوظ ماحول میں اس ثقافتی تہوار سے لطف اندوز ہو سکیں۔
