بےنظیر انکم سپورٹ پراگرام کی مستحق خواتین کیلئے اہم اعلان

بی آئی ایس پی حکام کے مطابق پروگرام سے مالی امداد حاصل کرنے والی تمام مستحق خواتین کے لیے ضروری ہے کہ وہ مقررہ تاریخ تک اپنے قریبی بی آئی ایس پی دفتر سے مفت موبائل سم حاصل کرلیں۔

حکام نے واضح کیا ہے کہ جن مستحق خواتین نے ابھی تک اپنی مفت ’بے نظیر سم‘ حاصل نہیں کی، انہیں 10 ستمبر تک یہ عمل مکمل کرنا ہوگا۔

بی آئی ایس پی انتظامیہ کے مطابق مفت سم کے حصول کا مقصد مستحق خواتین کو مالی امداد کی رقم کی شفاف اور محفوظ ترسیل کو یقینی بنانا ہے۔

حکام نے خبردار کیا ہے کہ جو خواتین مقررہ تاریخ تک اپنی مفت سم حاصل نہیں کریں گی، ان کے اکاؤنٹس میں بے نظیر کفالت پروگرام کی سہ ماہی قسط کی رقم منتقل نہیں کی جا سکے گی۔

یہ بھی پڑھیں: پنجاب کی عوام کے لیے بڑی خوشخبری، 50 کروڑ روپے کے بلاسود قرضوں کی منظوری

بی آئی ایس پی کی جانب سے تمام مستحق خواتین سے اپیل کی گئی ہے کہ وہ اپنی سہ ماہی مالی امداد کی بلا تعطل فراہمی یقینی بنانے کے لیے آخری تاریخ کا انتظار نہ کریں اور جلد از جلد اپنے قریبی بی آئی ایس پی دفتر کا رخ کریں۔

حکام کے مطابق مستحق خواتین کو اپنے ڈیوائس کے ساتھ منسلک سم کی تصدیق اور وصولی کا عمل بھی مکمل کرنا ہوگا۔

بی آئی ایس پی انتظامیہ نے مستحقین کو “سم حاصل کریں، رقم وصول کریں” کے اصول پر عمل کرتے ہوئے بروقت مفت سم حاصل کرنے کی ہدایت کی ہے تاکہ مالی امداد کی رقم کے حصول میں کسی قسم کی رکاوٹ پیش نہ آئے۔

واضح رہے کہ مفت سم کے حصول کے لیے مستحق خواتین کو صرف متعلقہ بی آئی ایس پی مراکز سے رجوع کرنا چاہیے اور کسی غیر متعلقہ شخص یا ایجنٹ کو اپنے ذاتی کوائف فراہم کرنے سے گریز کرنا چاہیے۔