عمران خان کے بیٹے پاکستان آنا چاہیں تو آسکتے ہیں: خواجہ آصف
سوشل میڈیا پلیٹ فارم ایکس پر بیان میں خواجہ آصف نے کہا کہ دونوں بھائی آخری بار 2022 میں نائیکوپ پر پاکستان آئے تھے اور ان کے کارڈز اب بھی موجود ہیں۔
ان کے مطابق سلیمان خان کا نائیکوپ 6 جنوری 2030 جبکہ قاسم خان کا کارڈ 8 نومبر 2032 تک مؤثر ہے۔
خواجہ آصف نے کہا کہ نائیکوپ رکھنے والے پاکستانی شہریوں کو ملک میں داخلے کے لیے ویزے کی ضرورت نہیں ہوتی اس لیے حکومت کی جانب سے ویزا نہ دینے کا تاثر درست نہیں۔
انہوں نے کہا کہ خاندان یا پی ٹی آئی کی جانب سے یہ کہنا کہ حکومت سلیمان اور قاسم خان کو ویزا نہیں دے رہی، درست نہیں ہے۔
دوسری جانب خواجہ آصف نے لاہور کے علامہ اقبال انٹرنیشنل ایئرپورٹ کا دورہ کیا جہاں انہوں نے مسافروں کی سہولت کے انتظامات اور جاری ترقیاتی منصوبوں کا جائزہ لیا۔
یہ بھی پڑھیں: علیمہ خان کو پی ٹی آئی کا صدر بنانے کی خبر جعلی نکلی
اے ایس ایف سیکنڈ ہولڈ کے انٹرنیشنل ایریا میں وزیر دفاع نے خواتین مسافروں کی طویل قطار دیکھی اور اضافی سرچ کاؤنٹر کھولنے کی ہدایت کی۔
انہوں نے نئے تعمیر شدہ امیگریشن ایریا کا بھی معائنہ کیا جبکہ زیر تعمیر ڈومیسٹک ڈیپارچر ایریا کے دورے کے دوران ڈراپ آف لین پر ٹریفک کے رش پر تشویش کا اظہار کیا اور متعلقہ احکام کو ضروری اقدامات کی ہدایت جاری کی ہے۔
