27 ستمبر،پورا پاکستان بند کرنے کا پلان،وزیراعلیٰ سہیل آفریدی کی تمام پارلیمینٹیرینزکوسخت ہدایات
وزیراعلیٰ کے مطابق نارتھ پنجاب خیبر پختونخوا کے ساتھ کھڑا ہوگا، جبکہ سنٹرل اور ویسٹ پنجاب لاہور کی جانب رخ کریں گے۔ ساؤتھ پنجاب کے خیبر پختونخوا سے متصل علاقوں کو بھی خیبر پختونخوا کے ساتھ شامل کیا جائے گا، جبکہ دیگر علاقوں میں شاہراہیں بند کرنے کی حکمت عملی اپنائی جائے گی۔
انہوں نے کہا کہ سندھ بھر میں اہم شاہراہیں بند کرنے کا منصوبہ ہے، جبکہ حیدرآباد اور کراچی والے مل کر کراچی کو بند کرنے کی کوشش کریں گے۔ دوسری جانب بلوچستان میں کوئٹہ سمیت اہم قومی شاہراہوں کو بند کرنے کی ہدایت دی گئی ہے۔
وزیراعلیٰ نے پارٹی کارکنوں اور رہنماؤں کو خبردار کرتے ہوئے کہا کہ گزشتہ تین برسوں سے کامیابی حاصل نہ ہونے کی ایک بڑی وجہ یہ ہے کہ کوشش دل سے نہیں کی گئی اور ذمہ داری ایک دوسرے پر ڈالی جاتی رہی۔
یہ بھی پڑھیں: فیلڈ مارشل سید عاصم منیر سرکاری دورے پر ترکیہ پہنچ گئے
انہوں نے دوٹوک الفاظ میں کہا کہ اس مرتبہ اگر کسی نے یہ سوچا کہ وہ اپنی ذمہ داری کسی اور پر ڈال کر خود بچ جائے گا تو ایسا نہیں ہوگا۔ جو شخص مصلحت یا خوف کا شکار ہے، اسے بھی اب اپنا کردار ادا کرنا ہوگا۔ 27 ستمبر کا بوجھ صرف عمران خان یا سہیل آفریدی پر نہیں آئے گا بلکہ پوری پارٹی کو اس کی ذمہ داری اٹھانا ہوگی۔
وزیراعلیٰ نے مزید کہا کہ کسی قسم کا بہانہ قبول نہیں کیا جائے گا۔ تمام پارلیمینٹیرینز اور ٹکٹ ہولڈرز کو اپنے اپنے حلقوں میں پہنچ کر سٹریٹ موومنٹ شروع کرنے کی ہدایت کی گئی ہے۔
پارٹی کی کارکردگی اور سرگرمیوں کی نگرانی کے لیے باقاعدہ مانیٹرنگ کمیٹی بنانے کا بھی اعلان کیا گیا ہے، جو پارلیمینٹیرینز اور ٹکٹ ہولڈرز کی سرگرمیوں کی نگرانی کرے گی۔
