9 مئی جی ایج کیو حملہ کیس، 47 ملزمان کو 10،10 سال قید کی سزا
پراسیکیوشن کی جانب سے مقدمے میں 19 گواہان کے بیانات ریکارڈ کرائے گئے، جب کہ مقدمے میں استغاثہ کے کل 44 گواہان کے بیانات قلم بند ہو چکے ہیں۔ عدالت نے سزا پانے والے 47 ملزمان کو 10،10 سال قید کی سزا سنائی اور ان کی جائیداد ضبط کرنے کا بھی حکم دیا۔
مقدمے کی تفصیلات کے مطابق سزا پانے والے ملزمان پر 9 مئی کے واقعات کی سازش میں ملوث ہونے کے الزامات ہیں۔ جے آئی ٹی نے ان ملزمان کو منصوبہ بندی میں مرکزی ملزم قرار دیا تھا۔
ان ملزمان میں عمر ایوب، زرتاج گل، شیخ راشد شفیق، مراد سعید، زلفی بخاری، شہباز گل، علی امین گنڈاپور، شاندانہ گلزار، حماد اظہر اور اعظم سواتی شامل ہیں۔
مقدمے میں احمد چٹھہ، رائے حسن نواز، رائے مرتضیٰ، شوکت بھٹی، عثمان سعید، اعجاز جازی، شبلی فراز اور کنول شوزب سمیت دیگر ملزمان بھی شامل ہیں۔
یہ بھی پڑھیں: عمران خان کی ہسپتال منتقلی، توہین عدالت کی درخواست پر اعتراض ختم، نمبر الاٹ
جی ایچ کیو حملہ کیس میں مجموعی طور پر 118 ملزمان نامزد تھے، جن میں سے 18 ملزمان دورانِ ٹرائل اشتہاری قرار دیے گئے، جب کہ 29 ملزمان مقدمے کے اندراج کے بعد عدالت میں پیش نہیں ہوئے۔
مقدمے میں ملزمان پر جی ایچ کیو گیٹ، حمزہ کیمپ اور آرمی میوزیم پر حملوں کے الزامات بھی عائد کیے گئے۔ اس کے علاوہ جلاؤ گھیراؤ، توڑ پھوڑ اور سرکاری عمارتوں و مقامات کو نقصان پہنچانے کے الزامات بھی مقدمے کا حصہ ہیں۔
عدالت کی جانب سے 47 اشتہاری ملزمان کے خلاف علیحدہ ٹرائل مکمل کرنے کے بعد فیصلہ جاری کردیا گیا، جس میں تمام سزا پانے والے ملزمان کو 10،10 سال قید اور جائیداد ضبط کرنے کا حکم دیا گیا ہے۔
واضح رہے کہ 9 مئی 2023 کو بانی پی ٹی آئی عمران خان کی گرفتاری عمل میں لائی گئی تھی، جس کے بعد ملک بھر میں پرتشدد احتجاج شروع ہوگئے تھے، جن میں سرکاری عمارتوں اور فوجی تنصیبات، بشمول جی ایچ کیو، کو نذرِ آتش اور نقصان پہنچایا گیا تھا۔
بعدازاں، عمران خان پر اس کیس میں 5 دسمبر 2023 کو فرد جرم عائد کی گئی تھی، وہ اگست 2023 سے اڈیالہ جیل میں قید ہیں۔
