رواں ماہ جزوی چاند گرہن کب ہو گا؟ جانیے
اس دوران چاند کا تقریباً 96 فیصد حصہ زمین کے سائے میں چلا جائے گا، تاہم یہ منظر پاکستان سے نظر نہیں آئے گا۔
ماہرین فلکیات کے مطابق جزوی چاند گرہن کے دوران چاند کا بڑا حصہ زمین کے سائے میں ہونے کے باعث سرخی مائل نارنجی رنگ اختیار کرسکتا ہے، جس سے آسمان پر ایک دلکش منظر پیدا ہوگا۔
محکمہ موسمیات اور ماہرین فلکیات کے مطابق جزوی چاند گرہن 28 اگست کو عالمی وقت کے مطابق صبح 4 بج کر 13 منٹ پر اپنے عروج پر ہوگا۔ اس موقع پر چاند کا تقریباً 96 فیصد حصہ زمین کے گہرے سائے میں موجود ہوگا۔
ماہرین کا کہنا ہے کہ اس فلکیاتی عمل کو مکمل چاند گرہن قرار نہیں دیا جاسکتا کیونکہ چاند کا معمولی حصہ زمین کے گہرے سائے سے باہر رہے گا، اسی وجہ سے اسے جزوی چاند گرہن کہا جارہا ہے۔
خیال رہے کہ چاند گرہن اس وقت رونما ہوتا ہے جب زمین سورج اور چاند کے درمیان آجاتی ہے اور زمین کا سایہ چاند پر پڑتا ہے۔
یہ بھی پڑھیں:پاکستان نے 16 سال بعد ہاکی ورلڈکپ کا میچ جیت لیا
اس دوران چاند کی روشنی میں نمایاں تبدیلی دیکھی جاسکتی ہے اور بعض اوقات چاند سرخ یا نارنجی دکھائی دیتا ہے، جسے عام طور پر بلڈ مون بھی کہا جاتا ہے۔
فلکیاتی ماہرین کے مطابق 2026 کا یہ جزوی چاند گرہن دنیا کے بعض خطوں میں دیکھا جاسکے گا، تاہم پاکستان میں رہنے والے افراد اس شاندار منظر کا مشاہدہ نہیں کرسکیں گے۔
