پاکستان نے 16 سال بعد ہاکی ورلڈکپ کا میچ جیت لیا
نیدرلینڈز کے شہر ایمسٹلوین میں کھیلے گئے میچ میں جاپان نے ابتدا ہی سے جارحانہ کھیل پیش کیا اور پہلے کوارٹر میں دو گول کرکے پاکستان پر دباؤ بڑھا دیا، تاہم پاکستان نے دوسرے کوارٹر میں مقابلے میں واپسی شروع کی اور وقفے تک خسارہ کم کرنے میں کامیاب رہا۔
دوسرے ہاف میں قومی ٹیم نے بہترین کھیل کا مظاہرہ کیا، رانا وحید اشرف نے شاندار کارکردگی دکھاتے ہوئے دو گول کیے، جبکہ حماد الدین اور حنان شاہد نے بھی ایک، ایک گول کرکے پاکستان کی فتح میں اہم کردار ادا کیا۔ حنان شاہد کا فیصلہ کن گول پاکستان کو 4-3 کی برتری دلانے میں کامیاب رہا، جو میچ کے اختتام تک برقرار رہی۔
پاکستان کی یہ کامیابی اس لحاظ سے بھی اہم ہے کہ قومی ٹیم نے آخری مرتبہ 2010 کے ہاکی ورلڈکپ میں کامیابی حاصل کی تھی، جب اس نے اسپین کو 2-1 سے شکست دی تھی۔
اس کے بعد 2014 کے ورلڈکپ کیلئے پاکستان کوالیفائی نہیں کرسکا، جبکہ 2018 کے ایڈیشن میں بھی گرین شرٹس کوئی میچ جیتنے میں ناکام رہے تھے۔
یہ بھی پڑھیں:بارش نے کھیل روک دیا، پاکستان کے 23 رنز پر 2 کھلاڑی آؤٹ
رواں ورلڈکپ میں پاکستان انگلینڈ کیخلاف شکست اور ویلز کیخلاف 3-3 سے ڈرا کے بعد اگلے مرحلے کی دوڑ سے باہر ہوگیا تھا، جس کے بعد ٹیم نے 9ویں سے 16ویں پوزیشن کے کلاسیفکیشن مرحلے میں شرکت کی۔
