پی آئی اے میں کیبن کریو کی بھرتیاں شروع
خواہشمند امیدواروں سے آن لائن درخواستیں وصول کرنے کا سلسلہ بھی شروع ہوگیا ہے۔
رپورٹس کے مطابق قومی ایئرلائن کی جانب سے نئے جہازوں کی خریداری سے قبل فضائی میزبانوں اور کیبن کریو کی بھرتیوں کا عمل مکمل کرنے کی منصوبہ بندی کی گئی ہے۔ نئے طیاروں اور مستقبل میں شروع کیے جانے والے نئے روٹس پر نوجوان اور تربیت یافتہ کیبن کریو ممبران کو تعینات کیا جائے گا۔
رپورٹس کے مطابق پی آئی اے میں کیبن کریو کی خالی آسامیوں کیلئے آن لائن درخواستیں وصول کی جارہی ہیں، جس سے ملک بھر میں اس شعبے میں ملازمت کے خواہشمند نوجوانوں کو روزگار کا موقع ملے گا۔
ابتدائی طور پر لاہور اور اسلام آباد کے دفاتر کیلئے کیبن کریو کی بھرتیاں کی جائیں گی، جبکہ منتخب امیدواروں کو فضائی سفر کے دوران مسافروں کی سہولت، حفاظت اور دیگر ضروری خدمات کی ذمہ داریاں سونپی جائیں گی۔
ذرائع کے مطابق پی آئی اے کی جانب سے نئے طیاروں اور روٹس کے حوالے سے مستقبل کی ضروریات کو مدنظر رکھتے ہوئے کیبن کریو کی افرادی قوت بڑھانے کا فیصلہ کیا گیا ہے۔ بھرتی کے عمل کے دوران امیدواروں کی اہلیت، جسمانی معیار اور دیگر متعلقہ شرائط کو مدنظر رکھا جائے گا۔
یہ بھی پڑھیں:حج ڈیجیٹل پورٹل کے ذریعے واجبات کی پہلی قسط کی ادائیگی جاری
خواہشمند امیدواروں کو ہدایت کی گئی ہے کہ وہ درخواست جمع کرانے سے قبل تمام شرائط اور ضروری دستاویزات سے متعلق تفصیلات کا جائزہ لے کر مقررہ طریقہ کار کے مطابق آن لائن اپلائی کریں۔
