منڈی بہاؤالدین میں سوشل میڈیا ایکٹیوسٹ کا قتل
میڈیا رپورٹس کے مطابق سیرا گاؤں کے رہائشی 48 سالہ ظفر اقبال گوندل اوران کا 30 سالہ بھتیجا حسنین گوندل پھالیہ میں عدالت میں پیشی کے بعد واپس گھر جا رہے تھے۔ جب ان کی گاڑی گاؤں کے قریب پہنچی تو مسلح افراد نے گاڑی پر اندھا دھند فائرنگ کردی۔
فائرنگ کے نتیجے میں ظفر اقبال اور حسنین گوندل کو متعدد گولیاں لگیں اور دونوں موقع پر ہی جاں بحق ہوگئے، جبکہ فائرنگ کے بعد گاڑی سڑک کنارے کھائی میں جا گری۔
دوہرے قتل کی اطلاع ملتے ہی پولیس اور پنجاب فرانزک کی ٹیمیں موقع پر پہنچ گئیں اور جائے وقوعہ سے شواہد اکٹھے کیے۔ لاشوں کو پھالیہ تحصیل ہیڈکوارٹر اسپتال منتقل کر دیا گیا، جہاں ڈاکٹروں نے پوسٹ مارٹم کے بعد لاشیں ورثا کے حوالے کردیں۔
یہ بھی پڑھیں: میرا نے ملازمہ پر تشدد کیوں کیا ؟ اصل وجہ سامنے آگئی
ظفر گوندل ٹک ٹاکر اور مقامی سوشل میڈیا ایکٹیوسٹ تھے۔ وہ اپنی ٹک ٹاک ویڈیوز میں اکثر اپنے سیاسی و سماجی مخالفین اور علاقے کے سیاست دانوں کو تنقید کا نشانہ بناتے تھے۔
واقعے کا نوٹس لیتے ہوئے آئی جی پنجاب راؤ عبدالکریم نے گوجرانوالہ ریجنل پولیس افسر سے رپورٹ طلب کرلی اور متعلقہ پولیس حکام کو ملزمان کا سراغ لگا کر جلد از جلد گرفتار کرنے کی ہدایت کی۔
منڈی بہاؤالدین پولیس کے ترجمان کے مطابق واقعے میں ملوث ملزمان کی گرفتاری کے لیے مختلف ٹیمیں تشکیل دے دی گئی ہیں۔
