مون سون کا چھٹا سپیل کب تک رہے گا؟ الرٹ جاری
پراونشل ڈیزاسٹر مینجمنٹ اتھارٹی (پی ڈی ایم اے) نے 21 اگست تک بارشوں کی پیشگوئی کرتے ہوئے متعلقہ اداروں کو الرٹ رہنے کی ہدایت کردی۔
پی ڈی ایم اے پنجاب کے مطابق گزشتہ 24 گھنٹوں کے دوران صوبے کے مختلف اضلاع میں مون سون بارشیں ریکارڈ کی گئیں۔ راولپنڈی میں سب سے زیادہ 130 ملی میٹر بارش ہوئی، جبکہ اٹک میں 79، لاہور ایئرپورٹ پر 65 اور وزیرآباد میں 50 ملی میٹر بارش ریکارڈ کی گئی۔
رپورٹس کے مطابق گوجرانوالہ اور جہلم میں 39، نارووال میں 33، منڈی بہاؤالدین میں 30، گجرات میں 19، سیالکوٹ میں 11 جبکہ مری میں 7 ملی میٹر بارش ریکارڈ کی گئی۔
پی ڈی ایم اے نے بتایا کہ آئندہ 24 گھنٹوں کے دوران بھی پنجاب کے بیشتر اضلاع میں مون سون بارشوں کا امکان ہے، مون سون بارشوں کا موجودہ چھٹا سپیل 21 اگست تک جاری رہ سکتا ہے۔
ڈی جی پی ڈی ایم اے پنجاب محمد سیف انور جپہ نے کہا ہے کہ وزیراعلیٰ پنجاب مریم نواز کی ہدایات کے پیش نظر صوبے بھر کے کمشنرز، ڈپٹی کمشنرز اور متعلقہ اداروں کو الرٹ رہنے کی ہدایت کردی گئی ہے۔
انہوں نے شہریوں کو احتیاطی تدابیر اختیار کرنے کی ہدایت کرتے ہوئے کہا کہ کچے اور بوسیدہ مکانات میں ہرگز رہائش اختیار نہ کریں۔ آسمانی بجلی کی گرج چمک کے دوران شہری محفوظ مقامات پر رہیں اور غیر ضروری طور پر کھلے مقامات پر جانے سے گریز کریں۔
یہ بھی پڑھیں:عمران خان اور بشریٰ بی بی کو ضمانت ملنی چاہیے، علیمہ خان کا مطالبہ
ڈی جی پی ڈی ایم اے نے کہا کہ کسی بھی ہنگامی صورتحال میں شہری پی ڈی ایم اے کی ہیلپ لائن 1129 پر رابطہ کرسکتے ہیں۔
