پرائیویٹ ورکشاپس سے ٹرانسفارمرز کی مرمت پر پابندی
اس حوالے سے لیسکو کی جانب سے کمپنی کے تمام سرکلز کے سپرنٹنڈنگ انجینئرز کو باقاعدہ مراسلہ بھیج دیا گیا ہے، جس میں ٹرانسفارمرز کی مرمت سے متعلق ہدایات جاری کی گئی ہیں۔
مراسلے کے مطابق سسٹم اور انڈیپنڈنٹ ٹرانسفارمرز کو نجی ورکشاپس سے مرمت نہیں کروایا جائے گا۔ لیسکو انتظامیہ نے واضح کیا ہے کہ پرائیویٹ ورکشاپس سے ٹرانسفارمرز کی مرمت کروانا غیر قانونی عمل ہے اور اس کی اجازت نہیں دی جائے گی۔
لیسکو حکام کے مطابق جلنے یا خراب ہونے والے ٹرانسفارمرز کی مرمت کیلئے محکمانہ طریقہ کار پر عمل کرنا ضروری ہوگا۔ قوانین کے تحت انڈیپنڈنٹ ٹرانسفارمر خراب ہونے کی صورت میں متعلقہ صارف کو ڈیمانڈ نوٹس جاری کیا جاتا ہے۔
ڈیمانڈ نوٹس میں نئے ٹرانسفارمر کی فراہمی یا خراب ٹرانسفارمر کی مرمت کے اخراجات شامل کیے جاتے ہیں۔ صارف کو مقررہ طریقہ کار کے مطابق متعلقہ اخراجات ادا کرنا ہوں گے۔
واضح رہے کہ لیسکو میں نجی ورکشاپس سے ٹرانسفارمرز بنوانا ایک معمول کی پریکٹس رہی ہے، تاہم اب کمپنی انتظامیہ نے اس عمل کو روکنے کا فیصلہ کیا ہے۔
لیسکو کی جانب سے سرکلز کے افسران کو ہدایت کی گئی ہے کہ وہ نجی ورکشاپس سے ٹرانسفارمرز کی مرمت کروانے کے عمل کی روک تھام یقینی بنائیں، خلاف ورزی کی صورت میں متعلقہ اہلکاروں کیخلاف محکمانہ کارروائی کی جائے گی۔
یہ بھی پڑھیں:بی آئی ایس پی دفتر میں فائرنگ سے نوجوان جاں بحق، خاتون زخمی
لیسکو کے اس فیصلے کے بعد ٹرانسفارمرز کی مرمت کیلئے صارفین اور متعلقہ افسران کو کمپنی کے طے شدہ قواعد و ضوابط کے مطابق کارروائی کرنا ہوگی۔
