پیٹرول اور ڈیزل پھر مہنگا، نئی قیمتوں کا اعلان ہوگیا
نئی قیمتوں کا اطلاق آج رات 12 بجے کے بعد سے نافذ العمل ہو گیا، جس کے بعد صارفین کو پیٹرول اور ڈیزل کی خریداری کیلئے پہلے سے زیادہ رقم ادا کرنا ہوگی۔
آئل اینڈ گیس ریگولیٹری اتھارٹی (اوگرا) کی جانب سے جاری کردہ نوٹیفکیشن کے مطابق پیٹرول کی قیمت میں 1 روپے 9 پیسے فی لیٹر اضافہ کیا گیا،اس اضافے کے بعد پیٹرول کی نئی قیمت 336 روپے 15 پیسے فی لیٹر مقرر کر دی گئی۔
اسی طرح ہائی اسپیڈ ڈیزل کی قیمت میں 2 روپے 42 پیسے فی لیٹر اضافہ کیا گیا، جس کے بعد ڈیزل کی نئی قیمت 393 روپے 4 پیسے فی لیٹر ہو گئی ہے۔ اوگرا کی جانب سے نئی قیمتوں کا باقاعدہ نوٹیفکیشن بھی جاری کر دیا گیا ہے۔
معاشی ماہرین کے مطابق پیٹرولیم مصنوعات کی قیمتوں میں اضافے کے اثرات صرف ٹرانسپورٹ کے شعبے تک محدود نہیں رہتے بلکہ اس سے اشیائے ضروریہ، زرعی لاگت اور مختلف کاروباری سرگرمیوں کے اخراجات میں بھی اضافہ ہونے کا امکان ہوتا ہے۔
ڈیزل کی قیمت بڑھنے سے مال برداری کے اخراجات میں اضافہ ہو سکتا ہے، جس کے باعث مہنگائی پر مزید دباؤ پڑنے کا خدشہ ظاہر کیا جا رہا ہے۔
حکومت کی جانب سے قیمتوں میں حالیہ ردوبدل عالمی منڈی میں خام تیل کی قیمتوں، درآمدی لاگت اور دیگر معاشی عوامل کو مدنظر رکھتے ہوئے کیا گیا ہے۔
نئی قیمتوں کے نفاذ کے بعد ملک بھر کے تمام پیٹرول پمپس پر پیٹرول اور ہائی اسپیڈ ڈیزل مقررہ نئی قیمتوں پر دستیاب ہوں گے۔
یہ بھی پڑھیں:13 سرکاری محکموں میں نئی بھرتیوں کا اعلان
شہریوں اور ٹرانسپورٹ سے وابستہ حلقوں نے قیمتوں میں اضافے پر تشویش کا اظہار کیا ہے، جبکہ معاشی ماہرین کا کہنا ہے کہ عالمی تیل کی قیمتوں میں آئندہ تبدیلیاں ملکی پیٹرولیم مصنوعات کی قیمتوں پر بھی اثر انداز ہو سکتی ہیں۔
