لیسکونے خراب ہونیوالے ٹرانسفارمرز کو فوری تبدیل کرنے کیلئے بڑا فیصلہ
کمپنی نے ہنگامی صورتحال سے نمٹنے کیلئے 200 ایمرجنسی ٹرالی ٹرانسفارمرز خریدنے کی منظوری دے دی ہے۔
لیسکو حکام کے مطابق بارشوں، آندھیوں اور دیگر وجوہات کے باعث اکثر علاقوں میں ٹرانسفارمرز جلنے یا خراب ہونے کے واقعات سامنے آتے ہیں، جس کے باعث صارفین کو طویل وقت تک بجلی کی بندش کا سامنا کرنا پڑتا ہے۔
نئی حکمت عملی کے تحت مختلف سب ڈویژنز کو ایمرجنسی ٹرالی ٹرانسفارمرز فراہم کیے جائیں گے تاکہ خراب ٹرانسفارمر کی جگہ فوری طور پر عارضی بجلی بحالی کا انتظام کیا جا سکے۔
ٹرالی ٹرانسفارمرز کی موجودگی سے بجلی کی فراہمی بحال کرنے کا عمل تیز ہو جائے گا اور صارفین کو گھنٹوں یا دنوں تک بجلی کی بندش کا سامنا نہیں کرنا پڑے گا۔ جب خراب ٹرانسفارمر کی مرمت یا نیا ٹرانسفارمر نصب کر دیا جائے گا تو عارضی طور پر لگایا گیا ٹرالی ٹرانسفارمر واپس ہٹا لیا جائے گا۔
لیسکو انتظامیہ کے مطابق مون سون کے دوران بجلی کے نظام کو مستحکم رکھنے کیلئے مختلف اقدامات کیے جا رہے ہیں، جن میں فیلڈ عملے کی تیاری اور ہنگامی صورتحال سے نمٹنے کیلئے وسائل میں اضافہ بھی شامل ہے۔
یہ بھی پڑھیں:پنجاب میں آئندہ 5 روز گرج چمک کے ساتھ برسات کی پیشگوئی
بجلی صارفین نے لیسکو کے اس اقدام کو خوش آئند قرار دیتے ہوئے امید ظاہر کی ہے کہ اس سے خاص طور پر بارشوں کے موسم میں بجلی کی بندش کے مسائل میں کمی آئے گی اور شکایات کے ازالے کا عمل مزید بہتر ہو سکے گا۔
