قصور: بارشی جوہڑ میں نہاتے ہوئے 2 معصوم بچے ڈوب کر جاں بحق
پولیس کے مطابق افسوسناک واقعہ تھانہ راجہ جنگ کی حدود میں دن تقریباً ڈیڑھ بجے پیش آیا۔ راجہ جنگ کے رہائشی ذوالفقار نے ریسکیو اور پولیس کو اطلاع دی کہ اس کا 10 سالہ بھتیجا سعد علی اور 12 سالہ احسان بارش کے جمع شدہ پانی میں نہانے کیلئے گئے تھے، تاہم کافی دیر تک واپس نہ آنے پر ان کی تلاش شروع کی گئی۔
اطلاع ملتے ہی پولیس موقع پر پہنچ گئی اور مقامی افراد کی مدد سے بچوں کی تلاش کا عمل شروع کیا گیا، کچھ دیر بعد دونوں بچوں کو بارشی جوہڑ سے نکالا گیا، تاہم وہ جانبر نہ ہو سکے اور موقع پر ہی دم توڑ چکے تھے۔
پولیس نے ضروری قانونی کارروائی مکمل کرنے کے بعد دونوں بچوں کی لاشیں ورثا کے حوالے کر دیں، واقعے کے بعد اہل خانہ پر کہرام مچ گیا جبکہ علاقے کے مکین بھی غمزدہ دکھائی دیے۔
مقامی شہریوں کا کہنا ہے کہ بارش کے بعد کئی مقامات پر پانی جمع ہو جاتا ہے، جو بچوں کیلئے خطرناک ثابت ہو سکتا ہے۔ انہوں نے متعلقہ اداروں سے مطالبہ کیا کہ ایسے مقامات کی بروقت نشاندہی، پانی کی نکاسی اور حفاظتی اقدامات کو یقینی بنایا جائے تاکہ مستقبل میں اس نوعیت کے افسوسناک واقعات سے بچا جا سکے۔
یہ بھی پڑھیں:کاکروچ جنتا پارٹی کا دھرنا ختم کرنے کا اعلان
مقامی انتظامیہ کا کہنا ہے کہ والدین بارش کے موسم میں بچوں پر خصوصی نظر رکھیں اور انہیں گہرے پانی، برساتی جوہڑوں اور ندی نالوں میں نہانے سے روکیں، کیونکہ معمولی سی غفلت بھی کسی بڑے سانحے کا سبب بن سکتی ہے۔
