دریائے چناب میں درمیانے درجے کا سیلاب وارننگ جاری
ادارے نے عوام کو غیر ضروری سفر سے گریز اور متعلقہ اداروں کو ہنگامی انتظامات مکمل رکھنے کی ہدایت جاری کی ہے۔
این ڈی ایم اے کے مطابق دریائے چناب میں خانکی، قادرآباد اور چنیوٹ پل کے مقامات پر درمیانے درجے کا سیلاب ریکارڈ کیا گیا ہے، جبکہ پلکھو نالہ وزیرآباد میں بھی پانی کی سطح درمیانے درجے کے سیلاب تک پہنچ چکی ہے۔
دوسری جانب دریائے سندھ میں کالاباغ، چشمہ اور تونسہ کے مقامات پر نچلے درجے کا سیلاب جاری ہے۔
رپورٹس کے مطابق دریائے چناب میں مرالہ اور تریموں، دریائے راوی میں بلوکی اور سدھنائی جبکہ دریائے کابل میں نوشہرہ کے مقام پر بھی نچلے درجے کا سیلاب موجود ہے۔ اسی طرح نالہ ایک اور پلکھو نالہ کینٹ پل پر بھی کم درجے کے سیلاب کی صورتحال برقرار ہے۔
این ڈی ایم اے نے خبردار کیا ہے کہ آئندہ گھنٹوں میں دریائے چناب کے مرالہ، خانکی، قادرآباد اور چنیوٹ پل پر پانی کے بہاؤ میں مزید اضافہ متوقع ہے، جبکہ تریموں بیراج پر پانی کی سطح بڑھ کر درمیانے درجے کے سیلاب تک پہنچ سکتی ہے۔
ادارے کے مطابق گوجرانوالہ، منڈی بہاؤالدین، سیالکوٹ، نارووال، فیصل آباد، سرگودھا، جھنگ، ملتان، حافظ آباد اور لاہور کے شہری علاقوں میں سیلابی صورتحال پیدا ہونے کا خدشہ ہے۔
اس کے علاوہ خیبرپختونخوا کے برساتی ندی نالوں، شمالی بلوچستان اور آئندہ دو روز کے دوران ڈی جی خان کے پہاڑی ندی نالوں میں بھی اچانک سیلاب آنے کا امکان ظاہر کیا گیا ہے۔
یہ بھی پڑھیں:بادل کب تک برسیں گے؟ محکمہ موسمیات کی پیشگوئی جاری
این ڈی ایم اے نے شہریوں کو ہدایت کی ہے کہ ممکنہ متاثرہ علاقوں کا غیر ضروری سفر کرنے سے گریز کریں، موسمی صورتحال سے باخبر رہیں اور مقامی انتظامیہ کی ہدایات پر عمل کریں۔
متعلقہ اداروں کو حساس مقامات کی مسلسل نگرانی، ریسکیو ٹیموں کی مکمل تیاری اور بند ہونے والی شاہراہوں کی فوری بحالی کے انتظامات یقینی بنانے کی بھی ہدایت جاری کی گئی ہے۔
