سرکاری ملازمین کیلئے سفری الاؤنس کا اعلان

محکمہ خزانہ خیبرپختونخوا کی جانب سے کنوینس الاؤنس میں اضافے کا باقاعدہ نوٹیفکیشن جاری کر دیا گیا ہے۔ اعلامیے کے مطابق گریڈ 1 سے گریڈ 20 اور اس سے اوپر کے تمام سرکاری ملازمین کے سفری الاؤنس میں اضافہ کیا گیا ہے، جس کا اطلاق یکم جولائی 2026 سے ہوگا۔

نوٹیفکیشن کے مطابق گریڈ 1 سے 4 تک کے ملازمین کا ماہانہ کنوینس الاؤنس 1 ہزار 785 روپے سے بڑھا کر 2 ہزار 677 روپے کر دیا گیا۔ اسی طرح گریڈ 5 سے 10 تک کے ملازمین کا سفری الاؤنس بڑھا کر 2 ہزار 898 روپے ماہانہ مقرر کیا گیا ہے۔

اعلامیے میں بتایا گیا ہے کہ گریڈ 11 سے 15 تک کے ملازمین کیلئے کنوینس الاؤنس میں اضافہ کرتے ہوئے اسے 4 ہزار 284 روپے ماہانہ کر دیا گیا، جبکہ گریڈ 16 سے 20 اور اس سے اوپر کے افسران کا سفری الاؤنس بڑھا کر 7 ہزار 500 روپے ماہانہ مقرر کیا گیا ہے۔

حکومت خیبرپختونخوا کے اس فیصلے کو ملازمین کیلئے مالی ریلیف قرار دیا جا رہا ہے، خاص طور پر ایسے وقت میں جب مہنگائی کے باعث روزمرہ اخراجات میں اضافہ ہوا ہے۔

یہ بھی پڑھیں:سرکاری ملازمین کی تنخواہوں کے بعد پنشن میں بھی اضافہ

دوسری جانب سندھ حکومت نے بھی سرکاری ملازمین کیلئے کنوینس الاؤنس میں اضافے کا اعلان کیا ہے۔ سندھ کابینہ کی جانب سے گریڈ 1 سے 16 تک کے ملازمین کے سفری الاؤنس میں اضافہ منظور کیا گیا ہے۔