پٹرولیم قیمتوں کے تعین کیلئے اوگرا کو پالیسی گائیڈ لائنز جاری
دستاویز کے مطابق اوگرا روزانہ پٹرولیم مصنوعات کی نئی قیمتیں اپنی ویب سائٹ پر جاری کرے گا ، اوگرا کو روزانہ قیمتوں کے اعلان کے لیے وفاقی حکومت کی منظوری درکار نہیں ہو گی ، پٹرول اور ڈیزل کی قیمتیں سات ورکنگ ڈیز کے اوسط عالمی نرخوں سے منسلک ہوں گی۔
ہفتہ اور اتوار کو پٹرولیم مصنوعات کی قیمتوں میں تبدیلی نہیں ہو گی ، پیٹرول کی قیمت درآمدی لاگت اور پریمیم کی بنیاد پر روزانہ طے ہو گی ، درآمد نہ ہونے کی صورت میں سالانہ اوسط پریمیم کے تحت قیمت مقرر کی جائے گی۔
دستاویز میں کہا گیا کہ ڈیزل کی قیمت بھی درآمدی لاگت اور سات روزہ اوسط کے مطابق مقرر ہو گی ، پٹرولیم لیوی کابینہ کی مقررہ حد سے زیادہ نہیں ہو گی ، پٹرولیم لیوی میں تبدیلی صرف وزارت خزانہ کی منظوری سے ممکن ہو گی۔
یکم جولائی 2026 سے اوگرا عالمی پلیٹس ریفرنس قیمتیں بھی ویب سائٹ پر جاری کرے گا ، شفافیت کے لیے عالمی قیمتوں کا روزانہ اجرا لازمی قرار دے دیا گیا۔
یہ بھی پڑھیں: حکومت کا پٹرولیم مصنوعات کی قیمتوں میں روزانہ ردوبدل کا فیصلہ
دستاویز کے مطابق مالی سال 2027 میں ہائی اسپیڈ ڈیزل کی درآمد صرف پی ایس او کرے گا ، پیٹرول کی درآمد او ایم سیز کو مارکیٹ شیئر کے مطابق کرنے کی اجازت ہو گی ، درآمدی شرائط کی خلاف ورزی پر او ایم سیز نو ماہ تک نااہل قرار دی جائیں گی۔
اسی طرح مٹی کے تیل اور لائٹ ڈیزل آئل کی قیمتیں بھی روزانہ مقرر کی جائیں گی، اوگرا کو قیمتوں کے نئے نظام پر فوری عملدرآمد کی ہدایت جاری کر دی گئی۔
