پاکستان جی ایس پی پلس سے سب سے زیادہ مستفید ہونیوالا ملک قرار
یورپی کمیشن کی رپورٹ کے مطابق 2024 میں پاکستان کی 7.5 ارب یورو مالیت کی برآمدات جی ایس پی پلس رعایتوں سے مستفید رہیں، جی ایس پی پلس کے باعث پاکستان کو 2024 میں تقریباً 732 ملین یورو کی ٹیرف بچت حاصل ہوئی۔
رپورٹ میں کہا گیا کہ پاکستان نے جی ایس پی پلس رعایتوں سے استفادے کی شرح 95.1 فیصد تک پہنچا دی، سال 2024 میں یورپی یونین نے پاکستان کی مجموعی برآمدات کا 28 فیصد درآمد کیا، پاکستانی ملبوسات، ٹیکسٹائل، چمڑے، تیار خوراک اور دیگر مصنوعات نے یورپی رعایتوں سے نمایاں فائدہ اٹھایا۔
یورپی کمیشن کے مطابق پاکستان نے جی ایس پی پلس سے متعلق تمام 27 بین الاقوامی کنونشنز کی توثیق برقرار رکھی، پاکستان نے یورپی یونین کے مانیٹرنگ عمل کے ساتھ مسلسل اور باقاعدہ تعاون جاری رکھا، قومی کمیشن برائے انسانی حقوق کو عالمی اے اسٹیٹس کا حصول، پاکستان کی اہم ادارہ جاتی پیش رفت قرار دیا گیا۔
رپورٹ میں قومی کمیشن برائے اقلیت کے قیام سے متعلق قانون سازی کو اقلیتوں کےتحفظ کی جانب اہم پیش رفت قرار دیا گیا جبکہ انسداد تشدد قانون کے عملی قواعد، تربیتی اقدامات اور جیل اصلاحات کو رپورٹ میں مثبت پیش رفت کے طور پر تسلیم کیا گیا۔
خواتین کے تحفظ، گھریلو تشدد کے تدارک اور کم عمری کی شادیوں کے خلاف قانون سازی کو نمایاں پیش رفت قرار دیا گیا جبکہ محنت کشوں کے حقوق، جبری مشقت کے خاتمے اور بچوں کی مشقت کے انسداد کے اقدامات کو رپورٹ میں سراہا گیا۔
یہ بھی پڑھیں: شاہ محمود کا جیل سے یورپی یونین کی جی ایس پی پلس سہولت بارے اہم بیان
رپورٹ میں پاکستان کی موسمیاتی پالیسی، کاربن مارکیٹ کے رہنما اصولوں اور حیاتیاتی تنوع کے تحفظ سے متعلق اقدامات کا اعتراف کیا گیا جبکہ انسداد منشیات کے نئے قوانین اور ڈیجیٹل کیس مینجمنٹ نظام کو مثبت پیش رفت قرار دیا گیا ہے۔
رپورٹ میں یورپی یونین نے پاکستان کے لیے 400 ملین یورو کے ترقیاتی اور اصلاحاتی تعاون کے عزم کا اعادہ بھی کیا۔
