اے سی چلانے سے روکنے پر بیٹے نے والد کو قتل کردیا، ماں، بہن زخمی
پولیس کے مطابق افسوسناک واقعہ فیروزوالہ کے علاقے گلفشاں ٹاؤن میں پیش آیا، جہاں گھر کے سربراہ نے بجلی کا بل زیادہ آنے پر اپنے بیٹے کو ایئرکنڈیشنر چلانے سے منع کیا، اس معاملے پر دونوں کے درمیان تلخ کلامی اور جھگڑا ہو گیا۔
ابتدائی تحقیقات کے مطابق والد کی جانب سے ڈانٹ ڈپٹ کیے جانے پر بیٹا مشتعل ہو گیا اور اس نے اسلحہ نکال کر گھر کے افراد پر فائرنگ کر دی، گولیاں لگنے سے والد موقع پر دم توڑ گیا جبکہ اس کی والدہ اور بہن بھی فائرنگ کی زد میں آگئیں۔
واقعے کی اطلاع ملتے ہی پولیس اور ریسکیو ٹیمیں جائے وقوعہ پر پہنچ گئیں، زخمیوں اور لاش کو فوری طور پر طبی اور قانونی کارروائی کے لیے ہسپتال منتقل کیا گیا، جہاں ڈاکٹروں نے والد کی موت کی تصدیق کر دی۔
پولیس کے مطابق جاں بحق شخص کی شناخت شیروز خان کے نام سے ہوئی جبکہ زخمی خواتین کی شناخت گلناز بی بی اور نجمہ کے ناموں سے کی گئی ہے، دونوں زخمی خواتین ماں بیٹی ہیں جنہیں ہسپتال میں طبی امداد فراہم کی جا رہی ہے۔
یہ بھی پڑھیں: تہرے قتل کا ڈراپ سین، ماں ہی تین بچوں کی قاتل نکلی
پولیس نے جائے وقوعہ سے شواہد اکٹھے کرکے واقعے کی تحقیقات شروع کر دی ہیں، حکام کا کہنا ہے کہ فائرنگ کرنے والا ملزم مقتول کا بیٹا ہے جو واردات کے بعد فرار ہو گیا۔
ملزم کی گرفتاری کے لیے مختلف مقامات پر چھاپے مارے جا رہے ہیں جبکہ پولیس نے یقین دہانی کرائی ہے کہ اسے جلد گرفتار کرکے قانون کے کٹہرے میں لایا جائے گا۔
