لکی مروت: جماعت اسلامی کے مقامی رہنما فائرنگ سے جاں بحق
پولیس کے مطابق فائرنگ کا افسوسناک واقعہ لکی مروت میں کرم پل کے قریب پیش آیا جہاں نامعلوم افراد نے جماعت اسلامی کے رہنما حاجی نقیب اللہ کو نشانہ بنایا۔
فائرنگ کے نتیجے میں حاجی نقیب اللہ شدید زخمی ہو گئے اور زخموں کی تاب نہ لاتے ہوئے جان کی بازی ہار گئے۔
پولیس حکام نے بتایا کہ مقتول حاجی نقیب اللہ جماعت اسلامی ڈڈیوالہ کے امیر تھے اور علاقے میں سیاسی و سماجی سرگرمیوں کے حوالے سے نمایاں مقام رکھتے تھے۔
ان کی اچانک موت کی خبر پھیلتے ہی جماعت اسلامی کے کارکنوں اور مقامی شہریوں میں شدید غم و غصہ پایا گیا۔
واقعے کی اطلاع ملنے پر پولیس اور امدادی ٹیمیں فوری طور پر جائے وقوعہ پر پہنچ گئیں، پولیس نے علاقے کو گھیرے میں لے کر شواہد اکٹھے کیے جبکہ حاجی نقیب اللہ کی لاش کو قانونی کارروائی اور پوسٹ مارٹم کے لیے سرائے نورنگ ہسپتال منتقل کر دیا گیا۔
جماعت اسلامی کے کارکنوں کی بڑی تعداد خبر ملتے ہی ہسپتال پہنچ گئی، جہاں انہوں نے مقتول رہنما کے اہل خانہ سے اظہارِ تعزیت کیا، کارکنوں نے حملے میں ملوث افراد کی فوری گرفتاری اور انہیں قانون کے مطابق سخت سزا دینے کا مطالبہ کیا ہے۔
یہ بھی پڑھیں: کراچی، لیاری میں جماعت اسلامی کے دفتر پر دستی بم حملہ
پولیس کا کہنا ہے کہ واقعے کی مختلف پہلوؤں سے تحقیقات کی جا رہی ہیں اور جائے وقوعہ کے اطراف موجود افراد سے معلومات حاصل کی جا رہی ہیں۔
حکام کے مطابق حملے کی فوری وجہ تاحال معلوم نہیں ہوسکی تاہم ملزمان کی شناخت اور گرفتاری کے لیے علاقے میں سرچ آپریشن شروع کر دیا گیا ہے۔
