کوئٹہ میں فائرنگ، پنجاب سے تعلق رکھنے والے 5 افراد قتل
پولیس ذرائع کے مطابق فائرنگ کا افسوسناک واقعہ واشک کے علاقے ماشکیل میں پیش آیا جہاں نامعلوم مسلح افراد نے فائرنگ کر کے 5 افراد کو موت کے گھاٹ اتار دیا۔
ذرائع کے مطابق جاں بحق ہونے والے پانچوں افراد کا تعلق پنجاب کے مختلف علاقوں سے تھا، مسلح افراد نے دکانوں پر فائرنگ کی جہاں پنجابی مزدور کام کر رہے تھے، فائرنگ کے بعد حملہ آور موقع سے فرار ہو گئے۔
پولیس ذرائع کا بتانا ہے کہ ضروری کارروائی کے بعد مقتولین کی لاشیں آبائی علاقوں کو روانہ کی جا رہی ہیں جبکہ واقعے کی تحقیقات کا آغاز کردیا گیا ہے ۔
دوسری جانب وزیر اعلیٰ بلوچستان میر سرفراز بگٹی نے ماشکیل میں نہتے اور بے گناہ مزدوروں کے بہیمانہ قتل کی شدید مذمت کی ہے۔
وزیراعلیٰ میر سرفراز بگٹی نے کہا کہ شہید ہونے والے صرف پنجابی مزدور نہیں تھے وہ پاکستان کے شہری، محنت کش اور ہمارے اپنے بھائی تھے، ان معصوم شہریوں پر حملہ کسی ایک صوبے یا قومیت پر نہیں بلکہ پاکستان کی وحدت، آئین اور ریاست پر حملہ ہے۔
ان کا کہنا تھا کہ آزادی کی نام نہاد تحریک کا لبادہ اوڑھنے والے دہشت گرد نہتے مزدوروں کو نشانہ بنا کر اپنے مکروہ عزائم دنیا کے سامنے بے نقاب کر چکے ہیں، دہشت گردوں کا مقصد کسی حق کی جدوجہد نہیں بلکہ دہشت، نفرت، خونریزی اور پاکستان کو غیر مستحکم کرنا ہے۔
یہ بھی پڑھیں: سرکاری ملازمین کی بیواؤں اور غیر شادی شدہ بیٹیوں کیلئے تاحیات پنشن بحال
وزیراعلیٰ نے کہا کہ ریاست دشمن عناصر اور ان کے سہولت کاروں کو کسی صورت معاف نہیں کیا جائے گا، پاکستانی شہریوں کے خون کے ہر قطرے کا حساب لیا جائے گا، دہشت گردی میں ملوث ہر مجرم کو انجام تک پہنچایا جائے گا۔
میر سرفراز بگٹی کا مزید کہنا تھا کہ ریاست کی رٹ پر حملہ کرنے والوں کے خلاف کارروائی مزید فیصلہ کن ہو گی، پاکستان کی ریاست دہشت گردی کے سامنے نہ کبھی جھکی ہے، نہ جھکے گی، آخری دہشت گرد کے خاتمے تک یہ جنگ پوری قوت کے ساتھ جاری رہے گی۔
