سرکاری ملازمین کی بیواؤں اور غیر شادی شدہ بیٹیوں کیلئے تاحیات پنشن بحال
وزیراعلیٰ پنجاب کی منظوری کے بعد محکمہ خزانہ نے نئی پالیسی کا باقاعدہ نوٹیفکیشن جاری کر دیا ہے، جس کے تحت مرحوم سرکاری ملازمین کی بیوائیں اور غیر شادی شدہ بیٹیاں عمر بھر پنشن حاصل کرنے کی اہل ہوں گی۔ نئی پالیسی کا مقصد انتقال کر جانے والے ملازمین کے اہلِ خانہ کو مستقل مالی تحفظ فراہم کرنا ہے۔
یاد رہے کہ سابق حکومت کے دور میں پنشن کے قوانین میں تبدیلی کرتے ہوئے کسی سرکاری ملازم کی وفات کے بعد اس کی بیوہ یا وارث غیر شادی شدہ بیٹی کیلئے پنشن کی مدت صرف 10 سال مقرر کر دی گئی تھی، تاہم موجودہ حکومت نے اس شرط کو ختم کرتے ہوئے دوبارہ تاحیات پنشن کی سہولت بحال کر دی ہے۔
نوٹیفکیشن کے مطابق پنشن کی ادائیگی مقررہ قواعد و ضوابط کے تحت کی جائے گی، اگر کسی مرحوم سرکاری ملازم کی بیوہ دوسری شادی کر لے تو اس کی پنشن بند کر دی جائے گی، جبکہ غیر شادی شدہ بیٹی قانون کے مطابق پنشن کی مستحق رہے گی۔
پالیسی میں یہ بھی واضح کیا گیا ہے کہ اگر کسی سرکاری ملازم کی ایک سے زیادہ بیوائیں ہوں تو پنشن کی رقم تمام بیواؤں میں برابر تقسیم کی جائے گی تاکہ تمام مستحقین کو ان کا جائز حق مل سکے۔
یہ بھی پڑھیں:مریم نواز کے 2 منصوبے عالمی اعزازت کے حقدار قرار
یہ فیصلہ وزیراعلیٰ مریم نواز شریف کی زیرِ صدارت ہونے والے پنجاب کابینہ کے حالیہ اجلاس میں کیا گیا، جہاں سرکاری ملازمین کے اہلِ خانہ کی فلاح و بہبود سے متعلق مختلف تجاویز پر غور کیا گیا۔
