حکومت پنجاب کا گھروں کی تعمیر کیلئے بلاسود قرضوں کا اعلان
حکومتی اعلامیے کے مطابق نئے گھر کی تعمیر کے لیے درخواست گزار 15 لاکھ روپے تک کا قرض حاصل کر سکیں گے، جبکہ گھروں کی مرمت یا چھت کی تعمیر کے لیے 5 لاکھ سے 10 لاکھ روپے تک قرض دیا جائے گا۔
اس سکیم کے تحت قرض کی واپسی کی مدت 5 سے 7 سال مقرر کی گئی ہے اور درخواست گزار آسان ماہانہ اقساط میں رقم واپس کریں گے۔ حکام کے مطابق قرض حاصل کرنے والے افراد کو ابتدائی 3 ماہ تک کوئی قسط ادا نہیں کرنا ہوگی، جس کے بعد تقریباً 14 ہزار روپے ماہانہ قسط مقرر ہوگی۔
حکومت پنجاب کا کہنا ہے کہ اس سکیم کے لیے درخواست گزار کے پاس اپنی ملکیتی زمین یا پلاٹ ہونا ضروری ہے۔ شہری علاقوں میں زیادہ سے زیادہ 5 مرلے جبکہ دیہی علاقوں میں 10 مرلے تک کے پلاٹ کے مالکان اس پروگرام سے فائدہ اٹھا سکتے ہیں۔ حکومت قرض پر عائد ہونے والے تمام مارک اپ کی ادائیگی خود کرے گی، جس کے باعث مستحق افراد کو مکمل بلاسود قرض فراہم کیا جائے گا۔
حکام کے مطابق یہ پروگرام پنجاب کے تمام شہروں میں نافذ العمل ہے۔ دلچسپی رکھنے والے افراد سرکاری آن لائن پورٹل (https://acag.punjab.gov.pk/) کے ذریعے درخواست جمع کرا سکتے ہیں۔
مزید رہنمائی کے لیے ہیلپ لائن **0800-09100** پر رابطہ یا اپنے قریبی ڈپٹی کمشنر (ڈی سی) آفس سے بھی معلومات حاصل کی جا سکتی ہیں۔
