عمران خان کیخلاف قائم تمام مقدمات بے بنیاد ہیں: علیمہ خان

انسداد دہشت گردی عدالت راولپنڈی کے باہر میڈیا سے گفتگو کرتے ہوئے علیمہ خان نے کہا کہ ان کا موقف صرف عمران خان کے قانونی اور آئینی حقوق کی بحالی ہے، ملاقاتیں انکی بنیادی ترجیح ہیں۔ انہوں نے کہا کہ بانی پی ٹی آئی کی صحت، علاج اور دیگر بنیادی حقوق ہر صورت یقینی بنایا جانا چاہیے۔

یہ بھی پڑھیں: پاکستان کے امیج کا ذرا سا بھی احساس ہے تو اسحاق ڈار استعفیٰ دیں: فیصل واوڈا

انہوں نے الزام عائد کیا کہ اڈیالہ جیل میں عمران خان کے بنیادی حقوق کی خلاف ورزی ہورہی ہے۔ ان کا کہنا تھا کہ بھائی سے ملاقات کی اجازت دینا کسی پر احسان نہیں بلکہ ان کا قانونی اور آئینی حق ہے جسے ہر صورت یقینی بنایا جائے۔

اس سے قبل 26 نومبر احتجاج کیس میں علیمہ خان نے انسداد دہشت گردی عدالت میں ضابطہ فوجداری کی دفعہ 342 کے تحت سوال نامے کا جواب جمع کرا دیا تھا، ان کے وکلا نے عدالت کو بتایا کہ دفاع کے حق میں مزید شواہد بھی پیش کیے جائیں گے جبکہ ایڈووکیٹ فتح اللّٰہ برکی کو دفاعی گواہی کے طور پر عدالت میں پیش کیا جائے گا۔