حکومت کو مذاکرات کیلئے ماحول بنانا ہوگا: بیرسٹر گوہر علی

راولپنڈی میں اڈیالہ روڈ پر میڈیا سے گفتگو کرتے ہوئے پاکستان تحریک انصاف کے چیئرمین بیرسٹر گوہر نے کہا کہ حکومت ایک طرف مذاکرات کی بات کررہی ہے جبکہ دوسری جانب پارٹی رہنماؤں اور کارکنان کو سزائیں دی جارہی ہیں اسلیے ایسے حالات میں مثبت پیش رفت ممکن نہیں ہے، ان کا کہنا ہے کہ اگر حکومت واقعی مذاکرات چاہتی ہے تو پہلے ایسا ماحول بنانا ہوگا جس سے اعتماد بحال ہو سکے۔

یہ بھی پڑھیں: ڈاکٹر یاسمین راشد کے انتقال کی افواہیں بے بنیاد قرار

انہوں نے کہا کہ وزیراعظم شہباز شریف نے قومی اسمبلی کے فلور پر مذاکرات کی دعوت دی تھی، جس پر پی ٹی آئی نے بھی واضح کیا تھا کہ سیاسی مسائل کا حل صرف سیاسی بات چیت سے ہی نکل سکتا ہے۔

بیرسٹر گوہر نے بشری بی بی کی فیملی سے ملاقات کا خیر مقدم کرتے ہوئے کہا کہ ملاقاتیں سب کا بنیادی حق ہیں۔ انہوں نے مطالبہ کیا کہ بانی پی ٹی آئی کی فیملی کو بھی ملاقات کی اجازت دی جائے کیونکہ 36 ہفتے گزرنے کے باوجود ملاقات نہ ہونے سے تشویش میں اضافہ ہورہا ہے۔

انہوں نے اس امید کا اظہار کیا کہ حکومت عملی اقدامات کرے تاکہ مذاکرات کا عمل آگے بڑھ سکے اور سیاسی کشیدگی میں کمی آئے۔