ڈاکٹر یاسمین راشد کے انتقال کی افواہیں بے بنیاد قرار

کوٹ لکھپت جیل حکام کی جانب سے بتایا گیا ہے کہ پی ٹی آئی رہنما ڈاکٹر یاسمین راشد بالکل خیریت سے ہیں اور اس وقت جیل میں موجود ہیں۔

حکام کا کہنا ہے کہ ڈاکٹر یاسمین راشد کی صحت سے متعلق سوشل میڈیا پر پھیلائی جانے والی افواہیں من گھڑت اور بے بنیاد ہیں، ایسی خبروں میں میں کوئی صداقت نہیں ہے۔

جیل انتظامیہ کا کہنا ہے کہ ڈاکٹر یاسمین راشد کو معمول کے طبی معائنے کے لیے وقتاً فوقتاً پاکستان انسٹی ٹیوٹ آف کارڈیالوجی (پی آئی سی)، حمید لطیف ہسپتال اور شوکت خانم ہسپتال لے جایا جاتا ہے، جہاں ان کا طبی معائنہ کیا جاتا ہے۔

جیل حکام نے عوام سے اپیل کی ہے کہ غیر مصدقہ خبروں پر کان نہ دھریں اور صرف مستند ذرائع سے جاری ہونے والی معلومات پر اعتماد کریں۔

یہ بھی پڑھیں: یاسمین راشد کا سزاؤں کیخلاف ہائیکورٹ سے رجوع

واضح رہے کہ مئی 2023 میں بانی پی ٹی آئی عمران خان کی گرفتاری کے بعد تحریک انصاف کی جانب سے ملک گیر احتجاج کیا گیا جس کے دوران پرتشدد مظاہروں میں سول و سرکاری عمارات کو نقصان پہنچایا گیا۔

پرتشدد مظاہروں میں سرکاری و نجی املاک کو نقصان پہنچانے اور پارٹی رہنماؤں کی جانب سے کارکنان کو اکسانے پر مقدمات درج کیے گئے تھے، یاسمین راشد و دیگر رہنماؤں کو متعدد مقدمات میں سزائیں سنائی جا چکی ہیں اور وہ کوٹ لکھپت سمیت مختلف جیلوں میں سزائیں کاٹ رہے ہیں۔