حکومت نے پنک ٹیکسی اسکیم شروع کرنے کا اعلان کر دیا
صوبائی وزیر اطلاعات شرجیل انعام میمن نے کہا ہے کہ نئی اسکیم کا مقصد خواتین کو محفوظ، بااعتماد اور آسان سفری سہولیات فراہم کرنا ہے۔
سندھ اسمبلی میں اظہار خیال کرتے ہوئے شرجیل انعام میمن نے کہا کہ صوبائی حکومت خواتین کی فلاح و بہبود اور خودمختاری کیلئے متعدد انقلابی منصوبوں پر کام کر رہی ہے۔
انہوں نے بتایا کہ الیکٹرک وہیکلز (ای وی) ٹیکسی اسکیم میں خواتین کیلئے خصوصی پنک ٹیکسی اسکیم بھی شامل کی جا رہی ہے، جس کی تفصیلات جلد سامنے لائی جائیں گی۔
ان کا کہنا تھا کہ حکومت نے ٹریفک پولیس اور متعلقہ حکام کو ہدایت جاری کی ہے کہ اگر کوئی مرد پنک اسکوٹی استعمال کرتے ہوئے پایا جائے تو اس کیخلاف کارروائی کی جائے، حکومت کو ایسی شکایات موصول ہوئی تھیں کہ بعض خواتین کے اہل خانہ، خصوصاً بھائی، ان کے نام پر فراہم کی گئی پنک اسکوٹیز استعمال کر رہے ہیں، جس کے تدارک کیلئے سخت اقدامات کیے جا رہے ہیں۔
شرجیل میمن نے کہا کہ پنک اسکوٹی اسکیم نے خواتین میں ڈرائیونگ لائسنس حاصل کرنے کا رجحان نمایاں طور پر بڑھایا ہے،ان کے مطابق جب اسکیم کا آغاز کیا گیا تو صرف 150 خواتین کے پاس ڈرائیونگ لائسنس موجود تھا، جبکہ اب 25 ہزار سے زائد خواتین لائسنس کے حصول کیلئے درخواستیں جمع کرا چکی ہیں۔
یہ بھی پڑھیں:پولیس چیک پوسٹ پر حملے میں ایک شخص جاں بحق، 5 زخمی
انہوں نے مزید کہا کہ حکومت کا ہدف مستقبل میں ایک لاکھ خواتین کو ڈرائیونگ لائسنس دلوانا ہے، جس کے بعد انہیں اسکوٹیز کی فراہمی بھی حکومت کی ذمہ داری ہوگی۔
