بلدیاتی انتخابات کے قائل ہیں لیکن کراچی جیسا نظام ہرگز قبول نہیں: سعد رفیق
مسلم لیگ ن کے سینیر رہنما سعد رفیق نے چیئرمین پیپلز پارٹی بلاول بھٹو زرداری کے بلدیاتی انتخابات سے متعلق بیان پر ردعمل دیتے ہوئے کہا ہے کہ لاہور اور اسلام آباد میں بلدیاتی نظام لانے کا مطالبہ درست ہے تاہم کراچی جیسے انداز میں انتخابات کرانے سے بہتر ہے کہ انتخابات نہ ہی کروائے جائیں۔
سعد رفیق نے کہا کہ کراچی کے گزشتہ بلدیاتی انتخابات کا طریقہ کار متنازع رہا، اس لیے لاہور میں ایسا نظام نافذ نہیں ہونا چاہیے، اگر کسی کو مزید معلومات درکار ہوں تو وہ جماعت اسلامی کے امیر حافظ نعیم الرحمن یا ایم کیو ایم کے چیئرمین خالد مقبول صدیقی سے رجوع کر سکتا ہے۔
یہ بھی پڑھیں: اب تک پیٹرول کی قیمت میں 155 روپے فی لیٹر کمی کی ہے: علی پرویز ملک
انہوں نے کہا کہ بلدیاتی ادارے عوامی مسائل کے حل کیلئے ہوتے ہیں اس لیے ان کا نظام شفاف، با اختیار اور قابل اعتماد ہونا چاہیے تاکہ شہریوں کو حقیقی نمائندگی اور بلدیاتی خدمات مل سکیں۔
واضح رہے کہ بلاول بھٹو زرداری نے قومی اسمبلی میں خطاب کے دوران مطالبہ کیا تھا کہ ملک بھر میں بلدیاتی انتخابات کروائے جائیں۔
ان کا کہنا تھا کہ سندھ میں بلدیاتی حکومتیں موجود ہیں جبکہ پنجاب اور اسلام آباد میں موثر بلدیاتی نظام قائم کیا جانا چاہیے، اسی کے ساتھ انہوں نے یہ بھی اعلان کیا کہ گلگت بلتستان میں نئی حکومت کے قیام کے بعد 90 روز کے اندر بلدیاتی انتخابات کرائے جائیں گے۔
