اب تک پیٹرول کی قیمت میں 155 روپے فی لیٹر کمی کی ہے: علی پرویز ملک
وفاقی وزیر برائے پیٹرولیم علی پرویز ملک نے سماجی رابطے کی ویب سائٹ ایکس پر پوسٹ میں لکھا کہ حکومت نہ تو کسی مخصوص شعبے کو غیر ضروری ترجیح دے رہی ہے اور نہ ہی کسی طبقے پر اضافی بوجھ ڈالا جا رہا ہے۔ ان کا کہنا تھا کہ حکومت اپنی بین الاقوامی ذمہ داریوں اور معاشی حالات کے دائرے میں رہتے ہوئے عوام کو ممکنہ ریلیف فراہم کرنے کے لیے پرعزم ہے۔
وفاقی وزیر نے مزید کہا کہ وزیراعظم شہباز شریف کی قیادت میں حکومت نے اب تک پیٹرول کی قیمت میں 155 روپے فی لیٹر جبکہ ڈیزل کی قیمت میں 200 روپے فی لیٹر تک کمی کی ہے، جو عوام کے لیے ایک بڑا ریلیف ہے۔
برائے اطلاعِ عام: براہِ مہربانی اس ہفتے کیلئے پیٹرول اور ڈیزل کی بین الاقوامی پلیٹس قیمتیں ملاحظہ کریں۔ حکومت نہ تو کسی شعبے کو ترجیح دے رہی ہے اور نہ ہی کسی دوسرے پر غیر ضروری بوجھ ڈال رہی ہے۔ حکومت اپنی بین الاقوامی ذمہ داریوں کے دائرے میں رہتے ہوئے، صارفین تک کوئی بھی فائدہ… pic.twitter.com/NPtvwY6cgr
— Ali Pervaiz Malik (@AliPervaiz450) June 27, 2026
انہوں نے کہا کہ عالمی منڈی میں خام تیل کی قیمتوں، درآمدی لاگت اور دیگر معاشی عوامل کو مدنظر رکھتے ہوئے پیٹرولیم مصنوعات کی قیمتوں کا تعین کیا جاتا ہے، تاکہ ملک کی معیشت پر بھی دباؤ نہ پڑے اور عوام کو بھی زیادہ سے زیادہ فائدہ پہنچایا جا سکے۔
علی پرویز ملک کا کہنا تھا کہ حکومت کی کوشش ہے کہ توانائی کے شعبے میں استحکام لایا جائے اور صارفین کو قابلِ برداشت نرخوں پر ایندھن کی فراہمی یقینی بنائی جائے۔
