علی ڈار سے وزیراعظم کے مشیرِ سیاحت کی ملاقات، تعاون پر اتفاق
وفاقی دارالحکومت اسلام آباد میں ہونے والی اس ملاقات میں پاکستان کے سیاحت اور ٹیکنالوجی کے شعبوں کے فروغ سے متعلق امور پر تفصیلی تبادلۂ خیال کیا گیا۔
ملاقات کے دوران دونوں رہنماؤں نے پاکستان کی سیاحتی صنعت میں موجود وسیع اور غیر استعمال شدہ امکانات پر گفتگو کی اور اس امر پر زور دیا کہ سیاحت کا شعبہ اقتصادی ترقی، غیر ملکی سرمایہ کاری، روزگار کے نئے مواقع اور عالمی سطح پر پاکستان کے مثبت تشخص کے فروغ میں اہم کردار ادا کر سکتا ہے۔
دونوں رہنماؤں نے پاکستان کو عالمی سطح پر ایک نمایاں سیاحتی مقام کے طور پر متعارف کرانے کے لیے جامع حکمتِ عملی کی ضرورت پر بھی زور دیا۔
یہ بھی پڑھیں: حکومت کا ہرقسم کی فیول سبسڈی ختم کرنے کا فیصلہ
ملاقات میں اس بات پر بھی اتفاق کیا گیا کہ ابھرتی ہوئی ٹیکنالوجیز سے فائدہ اٹھاتے ہوئے جدت، بہتر طرزِ حکمرانی اور معیشت کے مختلف شعبوں میں پائیدار ترقی کو فروغ دیا جا سکتا ہے۔
دونوں شخصیات نے سیاحت اور ٹیکنالوجی کے شعبوں سے وابستہ فریقین کے درمیان تعاون کو فروغ دینے کے عزم کا اظہار کیا تاکہ پاکستان کے ترقیاتی ایجنڈے کو آگے بڑھایا جا سکے، عالمی مسابقت میں اس کی پوزیشن مستحکم ہو اور نوجوان نسل کے لیے نئے مواقع پیدا کیے جا سکیں۔
