اسلام آباد سمیت ملک کے مختلف شہروں میں زلزلے کے جھٹکے
پی ڈی ایم اے پنجاب کے مطابق وفاقی دارالحکومت اسلام آباد سمیت پنجاب کے مختلف شہروں لاہور، راولپنڈی، اٹک، چکوال, میانوالی، ملتان، پوٹھوہار ریجن اور صوبے کے دیگر اضلاع میں زلزلے کے جھٹکے محسوس کیے گئے۔
ترجمان پی ڈی ایم اے نے بتایا کہ ریکٹر سکیل پر زلزلے کی شدت 5.4 ریکارڈ کی گئی ، زلزلے کا مرکز ہندوکش ریجن تھا جبکہ زلزلے کی گہرائی 215 کلومیٹر ریکارڈ کی گئی۔
زلزلے کے باعث شہریوں میں خوف و ہراس پھیل گیا اور لوگ کلمہ طیبہ کا ورد کرتے ہوئے گھروں ، دکانوں و دفاتر سے کھلے مقامات پر نکل آئے۔
پی ڈی ایم اے ترجمان کا کہنا تھا کہ پنجاب میں زلزلے کے باعث کوئی جانی یا مالی نقصان رپورٹ نہیں ہوا، متعلقہ انتظامیہ عمارتوں کی چیکنگ میں مصروف ہے، پی ڈی ایم اے کے صوبائی کنٹرول روم سمیت پنجاب بھر کے ضلعی ایمرجنسی آپریشن سنٹرز 24 گھنٹے فعال ہیں۔
یہ بھی پڑھیں: لاہور و گردونواح میں زلزلے کے جھٹکے، شہری خوفزدہ
علاوہ ازیں خیبرپختونخوا کے مختلف علاقوں میں بھی زلزلے کے جھٹکے محسوس کیے گئے، خیبرپختونخوا کے اضلاع پشاور، سوات، باجوڑ، بونیر، ہنگو، شانگلہ،کوہاٹ، مہمند اور شبقدر سمیت گردونواح میں زلزلے کے شدید جھٹکوں کے باعث شہری خوفزدہ ہو گئے۔
