ایم ڈی کیٹ امیدواروں کیلئے بڑی خوشخبری
تفصیلات کے مطابق رواں سال ایم ڈی کیٹ امتحان کے انعقاد کیلئے مزید تین نئے شہروں میانوالی، لیہ اور بہاولنگر کو بھی امتحانی مراکز کی فہرست میں شامل کرنے کا فیصلہ کیا گیا ہے، جس کے بعد ہزاروں طلبہ کو دور دراز شہروں کا سفر کرنے سے نجات مل جائے گی۔
رپورٹس کے مطابق متعلقہ انتظامیہ نے یونیورسٹی آف ہیلتھ سائنسز (یو ایچ ایس) کو تین نئے امتحانی مراکز قائم کرنے کیلئے فوری اقدامات کی ہدایت جاری کر دی ہے۔
واضح رہے کہ نئے مراکز کے قیام کا مقصد طلبہ کو ان کے آبائی علاقوں کے قریب امتحان دینے کی سہولت فراہم کرنا اور امتحانی عمل کو مزید مؤثر بنانا ہے۔
رواں سال ایم ڈی کیٹ امتحان پہلے کے مقابلے میں زیادہ شہروں میں منعقد ہوگا، گزشتہ برس امتحان 12 شہروں میں لیا گیا تھا، تاہم اس بار امتحانی شہروں کی تعداد بڑھا کر 15 کر دی گئی، اسی طرح امتحانی مراکز کی مجموعی تعداد بھی 26 سے بڑھا کر 32 کرنے کا فیصلہ کیا گیا ہے۔
خیال رہے کہ نئے امتحانی مراکز کے قیام سے طلبہ کے سفری اخراجات اور وقت دونوں کی بچت ہوگی، جبکہ امتحان کے روز غیر ضروری مشکلات میں بھی کمی آئے گی۔ والدین اور طلبہ نے اس اقدام کا خیرمقدم کرتے ہوئے اسے ایک مثبت اور طلبہ دوست فیصلہ قرار دیا ہے۔
یہ بھی پڑھیں:سکولوں میں پرائمری سطح پر یونیفارم ختم کرنے کا فیصلہ
ذہن نشین رہے کہ ایم ڈی کیٹ 2026 کا امتحان 16 اگست کو منعقد ہوگا، جس میں ہزاروں طلبہ میڈیکل اور ڈینٹل کالجوں میں داخلے کیلئے اپنی صلاحیتوں کا مظاہرہ کریں گے۔
