پنجاب: کاروبار کے اوقات دوبارہ تبدیل، نوٹیفکیشن جاری
نجی ٹی وی کی رپورٹ کے مطابق حکومتِ پنجاب کی جانب سے توانائی کے مؤثر استعمال اور تجارتی سرگرمیوں کے اوقات کار کو منظم کرنے کے لیے مارکیٹوں اور کاروباری مراکز کے لیے نئے اوقات کار مقرر کیے گئے ہیں۔
رپورٹ میں بتایا گیا کہ چیف سیکرٹری پنجاب زاہد اختر زمان کی منظوری کے بعد سیکرٹری انڈسٹریز اینڈ کامرس سید مسعود نعمان نے کاروباری اوقات کار کے حوالے سے نیا نوٹیفکیشن جاری کر دیا۔
نوٹیفکیشن میں کہا گیاہے کہ صوبہ بھر میں تمام دکانیں، مارکیٹیں اور شاپنگ مالز 8 بجے کے بجائے اب رات 9 بجے بند ہوں گے جبکہ شادی ہالز، مارکیاں اور دیگر کمرشل تقریبات رات 10 بجے تک جاری رکھی جا سکیں گی۔
حکومت نے ریستورانوں، ہوٹلز اور سبزی فروخت کرنے والی دکانوں کو رات 11 بجے تک کاروبار کرنے کی اجازت دی ہے۔
نوٹیفکیشن میں بعض شعبوں کو ان پابندیوں سے مستثنیٰ قرار دیا گیا ہے، کاروباری اوقات کی پابندی کا اطلاق میڈیکل اسٹورز، آئی ٹی کمپنیوں، تندور، جمز اور فیول اسٹیشنز پر نہیں ہو گا۔
یہ بھی پڑھیں: اسلام آباد، سمارٹ لاک ڈاؤن کے اوقات کار میں بڑی تبدیلی
ضلعی حکام نے خبردار کیا ہے کہ حکومتی احکامات کی خلاف ورزی کرنے والوں کیخلاف قانونی کارروائی عمل میں لائی جائے گی۔
شہریوں سے اپیل کی گئی ہے کہ وہ نئے اوقات کار کا خیال رکھتے ہوئے اپنی روزمرہ سرگرمیوں کو ترتیب دیں اور انتظامیہ کے ساتھ مکمل تعاون کریں۔
