فائرنگ کے افسوسناک واقعے میں امن کمیٹی کے 4 ارکان جاں بحق
پولیس کے مطابق یہ واقعہ کلاچی کے علاقے اٹل شریف میں پیش آیا، جہاں نامعلوم مسلح افراد نے گھات لگا کر امن کمیٹی کے ارکان پر اچانک فائرنگ کر دی۔ حملہ اس وقت کیا گیا جب متاثرہ افراد معمول کی سرگرمی میں مصروف تھے۔ فائرنگ کے نتیجے میں چاروں ارکان موقع پر ہی دم توڑ گئے۔
واقعے کی اطلاع ملتے ہی پولیس اور سیکیورٹی ادارے فوری طور پر جائے وقوعہ پر پہنچ گئے اور علاقے کو گھیرے میں لے لیا گیا۔ ابتدائی شواہد اکٹھے کرنے کے بعد لاشوں کو قریبی اسپتال منتقل کر دیا گیا۔
پولیس حکام کا کہنا ہے کہ واقعے کے بعد علاقے میں ناکہ بندی کر دی گئی ہے جبکہ ملزمان کی گرفتاری کیلئے سرچ آپریشن بھی شروع کر دیا گیا ہے۔ سیکیورٹی فورسز نے قریبی علاقوں میں مشتبہ افراد کی تلاش تیز کر دی ہے۔
یہ بھی پڑھیں:سابق سفیر ایاز وزیر کی بیٹی ٹریفک حادثے میں چل بسیں
حملہ آوروں کی شناخت اور محرکات جاننے کیلئے مختلف پہلوؤں سے تفتیش کی جا رہی ہے، جبکہ علاقے میں امن و امان برقرار رکھنے کیلئے اضافی نفری بھی تعینات کر دی گئی ہے۔
یہ افسوسناک واقعہ علاقے میں جاری امن کوششوں کیلئے ایک بڑا دھچکا قرار دیا جا رہا ہے، جبکہ مقامی آبادی میں شدید تشویش پائی جاتی ہے۔
