سابق سفیر ایاز وزیر کی بیٹی ٹریفک حادثے میں چل بسیں
تفصیلات کے مطابق افسوسناک حادثہ اسلام آباد میں پریڈ گراؤنڈ میٹرو اسٹیشن کے قریب پیش آیا، جہاں ایک کار تیز رفتاری کے باعث بے قابو ہو کر فٹ پاتھ پر چڑھ گئی، حادثے کے نتیجے میں گاڑی میں سوار خاتون موقع پر ہی دم توڑ گئیں۔
پولیس ذرائع کے مطابق حادثے میں شامل گاڑی سوزوکی سوئفٹ تھی جس کا نمبر سی بی-214 بتایا جا رہا ہے، یہ گاڑی ایاز خان کے نام پر رجسٹرڈ ہے، ابتدائی شواہد کے مطابق حادثہ تیز رفتاری کے باعث پیش آیا، تاہم حتمی وجوہات جاننے کیلئے تفتیش جاری ہے۔
ریسکیو اہلکاروں نے موقع پر پہنچ کر لاش کو پمز اسپتال منتقل کیا، جہاں ضروری کارروائی مکمل کی جا رہی ہے۔ پولیس نے واقعے کی باقاعدہ تحقیقات شروع کر دی ہیں اور مختلف پہلوؤں کا جائزہ لیا جا رہا ہے تاکہ حادثے کی اصل وجہ سامنے آ سکے۔
یہ بھی پڑھیں:سینیگالی صدر نے وزیر اعظم کو برطرف کر دیا
حادثے کی خبر پھیلتے ہی علاقے میں افسوس اور غم کی فضا قائم ہو گئی۔ سفارتی حلقوں، دوستوں اور اہل علاقہ نے واقعے پر گہرے دکھ اور افسوس کا اظہار کرتے ہوئے مرحومہ کے لیے دعائے مغفرت کی ہے۔
