بے نظیر انکم سپورٹ پروگرام کو صوبوں کے حوالے کرنے کی تجویز

ذرائع کا بتانا ہے کہ مجوزہ آئینی ترمیم کے حوالے سے حکومت اور اتحادی جماعت پیپلز پارٹی کے درمیان پس پردہ مذاکرات جاری ہیں، مجوزہ آئینی ترمیم اور بعض قوانین میں ترامیم کے لیے تین سے چار مسودے تیار کر لیے گئے ہیں اور ان مسودوں پر روزانہ کی بنیاد پر مشاورت جاری ہے۔

ذرائع نے بتایا ہے کہ مجوزہ آئینی ترمیم میں نئے این ایف سی ایوارڈ کے ساتھ ساتھ نہروں والا معاملہ بھی زیر بحث ہے جبکہ بے نظیر انکم سپورٹ پروگرام کو صوبوں کے حوالے کرنے کی تجویز زیر غور ہے۔

ذرائع کے مطابق وفاق نے بے نظیر انکم سپورٹ پروگرام کا بجٹ بوجھ اٹھانے سے انکار کر دیا ہے۔

حکومتی ذرائع کے مطابق وفاقی حکومت نے مؤقف اپنایا ہے کہ اس پروگرام کی مد میں وفاقی حکومت سالانہ 700 ارب سے زائد کا بوجھ اٹھا رہی ہے۔

یہ بھی پڑھیں: بینظیر انکم سپورٹ پروگرام کی رقم میں اضافے کا اعلان

وفاق کا مؤقف ہے کہ دفاع،قرضوں اور سود کی ادائیگی کے بعد وفاق کے پاس کچھ نہیں بچتا، صوبے بے نظیر انکم سپورٹ پروگرام کا بوجھ خود اٹھائیں اور فنڈز بھی مختص کریں۔

ذرائع کا مزید بتانا ہے کہ اتحادی جماعت پیپلز پارٹی نے ابھی تک ان حکومتی تجاویز پر آمادگی ظاہر نہیں کی۔