صحافی ولی بابر قتل کیس کا ملزم جیل سے فرار ہوگیا

پولیس حکام کے مطابق ملیر جیل میں معمول کی گنتی کے دوران ایک قیدی کم پایا گیا، جس پر فوری طور پر تلاشی آپریشن شروع کر دیا گیا۔ ابتدائی معلومات کے مطابق فرار ہونے والے قیدی کی شناخت نوید عرف پولکا کے نام سے ہوئی ہے جو قتل اور اغوا کے سنگین مقدمات میں ملوث تھا۔

ذرائع کے مطابق ملزم نوید کو چند روز قبل جوہر آباد پولیس نے گرفتار کیا تھا، جس کی نشاندہی پر ایک مغوی کی لاش بھی برآمد کی گئی تھی, ملزم پر ریحان نامی تاجر کو اغوا کے بعد قتل کرنے کا الزام بھی ہے۔

مزید انکشاف ہوا ہے کہ فرار ہونے والا ملزم ماضی میں صحافی ولی بابر قتل کیس میں بھی گرفتار رہ چکا ہے، تاہم بعد ازاں شواہد کی کمی کے باعث اسے بری کر دیا گیا تھا۔

جیل انتظامیہ کے مطابق واقعہ اس وقت پیش آیا جب معرکہ حق سے متعلق ایک تقریب کے بعد قیدیوں کی دوبارہ گنتی کی جا رہی تھی۔ گنتی کے دوران ایک قیدی کی غیر موجودگی کا علم ہوا جس کے بعد ہنگامی اقدامات شروع کیے گئے۔

یہ بھی پڑھیں:پولیس چوکی پر خودکش حملہ، 12 اہلکار شہید

واضح رہے کہ گزشتہ سال بھی ملیر جیل سے 200 سے زائد قیدی فرار ہو گئے تھے جس کے بعد سکیورٹی سخت کی گئی تھی، تاہم حالیہ واقعے نے ایک بار پھر جیل نظام پر سوالات کھڑے کر دیے ہیں۔

پولیس اور قانون نافذ کرنے والے اداروں نے مفرور قیدی کی تلاش کیلئے شہر بھر میں ناکہ بندی اور چھاپے شروع کر دیے ہیں۔