پولیس چوکی پر خودکش حملہ، 12 اہلکار شہید

پولیس حکام کے مطابق دہشت گرد بارود سے بھری گاڑی پولیس چوکی سے ٹکرا کر فرار ہونے میں کامیاب ہوگئے، جس کے نتیجے میں زور دار دھماکا ہوا اور عمارت کا ایک حصہ زمین بوس ہو گیا، دھماکے کی شدت دور دور تک محسوس کی گئی جبکہ علاقے میں خوف و ہراس پھیل گیا۔

ریسکیو ذرائع کے مطابق دھماکے کے بعد فوری طور پر امدادی کارروائیاں شروع کر دی گئیں، پولیس اور ریسکیو ٹیموں نے ملبے تلے دبے اہلکاروں کو نکالنے کیلئے سرچ اینڈ ریسکیو آپریشن شروع کیا، جس کے دوران 3 اہلکاروں کو زندہ نکال لیا گیا۔ زخمیوں کو فوری طور پر ڈسٹرکٹ ہیڈ کوارٹر اسپتال منتقل کیا گیا جہاں انہیں طبی امداد فراہم کی جا رہی ہے۔

ڈی آئی جی بنوں ریجن سجاد خان نے رات گئے ڈی ایچ کیو اسپتال کا دورہ کیا اور زخمی اہلکاروں کی عیادت کی، انہوں نے واقعے کو بزدلانہ کارروائی قرار دیتے ہوئے کہا کہ دہشت گرد عناصر کیخلاف کارروائیاں مزید تیز کی جائیں گی۔

یہ بھی پڑھیں:معرکہ حق، فتح کا ایک سال مکمل ہونے پر جی ایچ کیو میں تقریب

پولیس کے مطابق علاقے کو گھیرے میں لے کر سرچ آپریشن جاری ہے جبکہ حملہ آوروں اور ان کے سہولت کاروں کی تلاش کیلئے مختلف مقامات پر چھاپے بھی مارے جا رہے ہیں۔